Retkoceri: Janë pastruar 55 lokacione me mbeturina, thirrja nga kandidatët uroj të mos shërbejë si fushatë politike

Lajme

Gazeta Express

21/05/2026 8:06

Ani pse në ditët e fundit ka nisur largimi i mbeturinave vëllimore nga disa zona të Prishtinës, kryeministri në detyrë, Albin Kurti, deklaroi se situata me mbeturinat në Kosovë është emergjente.

Në lidhje me këtë çështje dhe aksionin e ndërmarrë nga Komuna e Prishtinës për pastrimin e mbeturinave, në një intervistë për Ekonomia Online, drejtori i Shërbimeve Publike në kryeqytet, Leutrim Retkoceri, tha se deri tani janë pastruar dhjetëra lokacione.

Retkoceri u shpreh se numri i madh i mbeturinave vëllimore erdhi si pasojë e vendimit të Ministrisë së Mjedisit dhe Planifikimit  Hapësinor.  

“Arsyeja pse ka qenë dhe është parë një vëllim kaq i madh i mbeturinave, është sepse për dy muaj rresht nuk janë marrë mbeturinat vëllimore dhe inertet nga kryeqyteti, pasi Ministria e Ambientit ka lëshuar një vendim, e cila ka bllokuar deponinë që ka qenë në Matiçan për këto mbeturina. Dhe kompanitë nuk kanë mundur t’i dërgojnë askund tjetër sepse nuk i kanë pranuar as në deponinë e Mirashit”, u shpreh ai.

Ai ka folur edhe për hapat që komuna ka ndërmarrë për menaxhimin e situatës dhe zgjidhjen afatgjate të problemit.

“Ne i kemi marrë të gjitha hapat e nevojshëm për sigurimin e lokacioneve dhe procedurën për të ndërtuar një qendër tranzitore të mbeturinave vëllimore, në të cilën po grumbullohen mbeturinat vëllimore dhe pastaj ato do të ndahen, klasifikohen dhe të shpërndahen në deponitë qendrore ashtu siç e kërkon edhe legjislacioni në fuqi. Aksioni është pritur jashtëzakonisht mirë nga qytetarët. Një fenomen çka është vërejtur është se në të gjitha lagjet, e sidomos ato urbane në kryeqytet, deponitë apo mbeturinat ilegale vendosen pranë kontejnerëve nga qytetarët që nuk jetojnë në ato lagje, fatkeqësisht”, thotë drejtori Retkoceri.

Duke folur për gjendjen aktuale në terren, Retkoceri tha se janë identifikuar dhjetëra lokacione problematike.  

“Nga ekipi i Shërbimeve Publike që jemi organizuar nga e shtuna, i kemi identifikuar 72 lokacione. Nga këto, deri më tani janë pastruar tërësisht 55 lokacione. Ka mbetur edhe një numër i vogël i lokacioneve pa përfunduar dhe ne shumë shpejt do të mbërrijmë edhe te përfundimi i atyre lokacioneve dhe do të kujdesemi për mirëmbajtjen, për çka kërkojmë ndihmën e të gjithë qytetarëve dhe personave që mund të kontribuojnë në identifikimin e kryerësve të këtyre veprimeve që hedhin mbeturina dhe në anën tjetër ndihmojnë në lokalizimin sa më të shpejtë të këtyre vendeve ku duhet të intervenohet”,  thekson tutje ai.    

Sa i përket deklaratës së Kurtit, ai uroi që deklaratat e tilla të mos shërbejnë si pjesë e fushatës.

“Kjo ka qenë e nevojshme qysh moti. Thirrja tani në fushatë zgjedhore nga të gjithë ata që janë kandidatë, uroj të mos shërbejë si fushatë politike, por të jetë një fushatë vetëdijesuese që i përgjigjet nevojës edhe vendit. Unë, sa e përmenda më herët, përderisa ministrja në detyrë e Ambientit kishte lëshuar një vendim, së bashku me inspektorë të kësaj ministrie, që të ndalohet dhe bllokohet një deponi për mbeturina vëllimore, kemi parë duke bërë thirrje që të dilet dhe të pastrohet qyteti. Kjo nuk shkon me njëra-tjetrën. Ne nuk duhet të udhëhiqemi nga politika të cilat e bllokojnë nivelin qendror dhe nivelin lokal njëra-tjetrën. Ne duhet të udhëhiqemi me parimin e shërbimeve sa më të mira për qytetarët, në mënyrë që të përmbushim obligimin përfaqësues që e kemi marrë nga qytetarët”, shtoi Retkoceri.    

Kryeministri në detyrë Albin Kurti dhe ministrja në detyrë Fitore Pacolli kanë prezantuar të mërkuren pakon e re për largimin e deponive ilegale të mbeturinave në të gjithë Kosovën. Gjatë prezantimit, u shpalosën masat institucionale për pastrimin e hapësirave publike dhe adresimin e ndotjes mjedisore, përmes një aksioni të ri shtetëror.

Kurti tha se gjendja me mbeturinat është serioze dhe në disa zona mund të konsiderohet edhe emergjencë, duke theksuar nevojën për ndërhyrje të menjëhershme institucionale.

Ai njoftoi se për këtë qëllim është përgatitur një projektligj i ri dhe një aksion kombëtar, i cili synon largimin e rreth 500 deponive ilegale në gjithë vendin, me një buxhet prej 1 milion euro.

Më 16 maj drejtoria e Shërbimeve Publike në Prishtinë ka nisur njê aksion për largimin e mbeturinave vëllimore.