Henry uron Arsenalin për titullin: Topçijë për jetë

Futboll

Gazeta Express

20/05/2026 16:08

Legjenda e Arsenalit, Thierry Henry, ka falënderuar skuadrën e Mikel Artetës pasi “Topçinjtë” u shpallën zyrtarisht kampionë të Premier League, duke i dhënë fund pritjes 22-vjeçare për titullin e elitës së futbollit anglez.

Francezi, një nga figurat kyçe të ekipit të fundit kampion të Arsenalit në vitin 2004, shprehu mirënjohjen e tij për gjeneratën aktuale të lojtarëve, të cilët rikthyen trofeun te klubi londinez dhe i dhanë një brez të ri tifozësh mundësinë të përjetojnë suksesin e madh.

Pritja e gjatë e Arsenalit mori fund pasi barazimi i Manchester Cityt ndaj Bournemouthit të martën mbrëma e konfirmoi matematikisht skuadrën e Artetës si kampione të Premier League. Për herë të parë që nga sezoni historik i “Të Pamposhturve” më 2003/04, trofeu rikthehet te Arsenali.

View this post on Instagram

A post shared by @thierryhenry

Henry, golashënuesi më i mirë në historinë e klubit dhe simbol i epokës së artë nën drejtimin e Arsene Wengerit, reagoi me emocion në rrjetet sociale. Për të, ky triumf kishte edhe një domethënie personale, pasi fëmijët e tij patën rastin ta shohin Arsenalin kampion për herë të parë në jetën e tyre.

“Nga ulëset e Highburyt te Emirates — Arsenal Nation, më në fund mund të festojmë”, shkroi Henry në Instagram. “Falënderime të veçanta për këtë gjeneratë — më në fund edhe fëmijët e mi na panë duke fituar ligën.”

Festës iu bashkua edhe Arsene Wenger, trajneri legjendar që e udhëhoqi Arsenalin drejt titujve në vitet 1998, 2002 dhe 2004. Në një video emocionuese të publikuar nga klubi, Wenger përgëzoi skuadrën aktuale dhe e cilësoi këtë moment si kohën e tyre.

“E arritët”, tha Wenger në mesazhin drejtuar lojtarëve. “Kampionët vazhdojnë përpara atëherë kur të tjerët ndalen. Kjo është koha juaj. Tani, shijojeni çdo moment.”

Pas rikthimit në majën e futbollit anglez, Arsenali e kthen vëmendjen te finalja e Ligës së Kampionëve. Skuadra londineze pritet të përballet me Paris Saint-Germain në stadiumin “Puskas Arena” në Budapest, më 30 maj, ku do të ketë mundësinë të sigurojë një dyshe historike trofesh.

Trofeu i Premier League do t’i dorëzohet Arsenalit pas ndeshjes së fundit të sezonit ndaj Crystal Palace në “Selhurst Park”. /GazetaExpress/