Casemiro do të largohet nga Unitedi në fund të sezonit, klubi e ‘gjen’ zëvendësuesin e tij

Futboll

Gazeta Express

10/05/2026 16:40

Casemiro pritet t’i japë lamtumirën “Old Traffordit” në fund të sezonit, ndërsa Manchester Unitedi duket se ka gjetur zëvendësuesin perfekt për brazilianin.

“Djajtë e Kuq” synojnë të përforcojnë skuadrën këtë verë për t’u përgatitur për sezonin e ardhshëm, pasi janë rikthyer në Ligën e Kampionëve pas një mungese dyvjeçare nga kompeticioni europian.

Edhe pse ende nuk është marrë një vendim përfundimtar se kush do ta drejtojë Manchester Unitedin sezonin e ardhshëm, Michael Carricku e ka vendosur veten në pozitë të favorshme pas një periudhe të mirë si trajner i përkohshëm; të paktën ky është mendimi i ish-asistentit të Sir Alex Fergusonit, Rene Meulensteen.

Forma e Casemiros nën drejtimin e Carrickut ka ngritur pikëpyetje nëse braziliani mund të mendojë të qëndrojë në “Old Trafford”, por ai duket i vendosur të largohet nga klubi, ndaj Unitedi duhet të gjejë zëvendësuesin e tij – dhe duket se e ka identifikuar kandidatin ideal.

Sipas gazetarit italian Alfredo Pedullà, Unitedi është në avantazh në garën për të transferuar Edersonin nga Atalanta këtë verë.

Pedullà shkroi në “X”: “#Ederson-#ManchesterUnited: bisedime të reja javën e ardhshme. Kemi folur për këtë transferim prej më shumë se një viti e gjysmë; United ishte klubi i parë që bëri lëvizje. Tani do të përpiqet të lërë pas konkurrencën duke kaluar barrierën e 40 milionë eurove”.

Edersoni ka qenë një lojtar kyç për Atalantën gjatë katër sezoneve të fundit, duke zhvilluar 178 ndeshje që nga transferimi i tij nga Salernitana.

Unitedi nuk është klubi i vetëm i interesuar për mesfushorin, pasi Atlético Madridi është lidhur prej kohësh me brazilianin.

Megjithatë, sipas “TEAMtalk”, klubi spanjoll nuk dëshiron të paguajë më shumë se 39 milionë paund, ndërsa Atalanta kërkon rreth 43 milionë paund.

Rivalët e Premierligës, Arsenali, gjithashtu janë të interesuar ta transferojnë Edersonin në “Emirates” këtë verë, me drejtorin sportiv Andrea Berta që besohet të jetë një admirues i madh i brazilianit./GazetaExpress/