Kosova shënon përparim në lirinë e medias, Kusari: Lajm fantastik

Lajme

Gazeta Express

30/04/2026 8:57

Juristja e mediave në Kosovë, Flutura Kusari ka reaguar pasi Kosova ka shënuar përparim në Indeksin Botëror të Lirisë së Shtypit të Reporterëve.

Kusari, përmes një postimi në profilin e saj në rrjetin social Facebook, ka thënë se kjo ka ndodhur pasi Gjykata Kushtetuese ka shfuqizuar ligjin kundërkushtetues për Komisionin e Pavarur për Media.

Ajo, ka renditur edhe disa arsye se përse sipas saj ky është një lajm fantastik.

Kosova është përmirësuar në indeksin e lirisë së shtypit të RSF-së, pasi Gjykata Kushtetuese ka shfuqizuar ligjin kundërkushtetues për Komisionin e Pavarur për Media.

Ky është një lajm fantastik për disa arsye:

1. E konfirmon që eksperimenti i qeverisë për të draftuar dhe miratuar ligje pa përfshirjen e sektorit të mediave, pa konsultim dhe me nxitim, në procedura të përshpejtuara pak para vitit të ri, duke shpërfillur opinionin ligjor të Këshillit të Europes dhe Bashkimit Europian ka qenë i rrezikshëm dhe e ka dëmtuar vendin tonë jashtëzakonisht shumë në rangim botëror.

2. E konfirmon që sistemi gjyqësor është mbrojtësi më i madh i lirisë së shprehjes dhe lirisë së mediave në pesë vitet e fundit. Është shtylla ku ne mbështetemi sa herë që jemi të atakuar nga pushteti ekzekutiv.

Poashtu, gjyqësori lavdërohet në veçanti nga RSF pasi që rastet e gazetarëve i trajton si prioritet [falë Strategjisë së KGJK-së për përmirësimin e qasjes në drejtësi].

Ky përmirësim në rangim është meritë 100% e sistemit gjyqësor.

Shpresoj që Lëvizja Vetëvendosje të reflektojë dhe, në tentativën tjetër për draftimin e ligjit, kurdo që vjen ai moment politik, t’i përmirësojë të gjitha gabimet që i ka bërë e që e kanë shkatërruar reputacionin e vendit tonë në nivel global.