Shpallet lista e shkurtër e Turner Prize 2026

Arte

Gazeta Express

23/04/2026 22:07

Tate Britain ka shpallur listën e kandidatëve për çmimin prestigjioz Turner Prize për vitin 2026, duke përfshirë katër artistë me qasje të ndryshme dhe inovative në artin bashkëkohor.

Në listën e ngushtë janë përzgjedhur Simeon Barclay, Tanoa Sasraku, Kira Freije dhe Marguerite Humeau.

Barclay është nominuar për performancën “The Ruin”, një vepër që ndërthur spoken word me muzikë live dhe trajton temat e identitetit, klasës dhe racës në Britani. Ndërkohë, Sasraku është përzgjedhur për ekspozitën “Morale Patch”, e cila eksploron historinë politike dhe ushtarake të naftës përmes skulpturave dhe instalacioneve.

Freije është vlerësuar për ekspozitën e saj “Unspeak the Chorus”, ku përdor materiale të ndryshme për të krijuar figura njerëzore me një ndikim të fortë emocional dhe vizual.

Ndërsa Humeau është nominuar për “Torches”, një ekspozitë që kombinon forma natyrore dhe elemente imagjinare, duke trajtuar tema ekologjike dhe ekzistenciale.

Drejtori i Tate Britain dhe kryetari i jurisë, Alex Farquharson, e cilësoi këtë përzgjedhje si një përfaqësim të pasur dhe të larmishëm të artit bashkëkohor, me theks të veçantë te instalacionet dhe skulptura.

Ekspozita me veprat e artistëve finalistë do të mbahet në Middlesbrough Institute of Modern Art nga 29 shtatori 2026 deri më 29 mars 2027, ndërsa fituesi do të shpallet më 10 dhjetor.

Fituesi i çmimit do të marrë 25 mijë paund, ndërsa tre finalistët e tjerë do të shpërblehen me nga 10 mijë paund secili.

Ky edicion i Turner Prize pritet të sjellë diskutime të reja mbi artin bashkëkohor dhe rolin e tij në shoqërinë moderne. /GazetaExpress/