E zhdukur që nga janari, gazetarja gjermane gjendet në burgun e Alepos

Lajme

Gazeta Express

21/04/2026 7:14

Gazetarja Eva Maria Michelmann nga Këlni, e cila rezultonte e zhdukur në Siri që nga mesi i janarit, dyshohet se po mbahet në një burg sirian. Sipas luftëtarëve kurdë, familja e saj ka kërkuar tashmë ndihmën e Ministrisë së Jashtme të Gjermanisë.

Sipas zyrës ligjore që përfaqëson familjen e gazetares, e cila punonte në rajonin e Rojavës në verilindje të Sirisë për media kurde, shumë dëshmitarë kanë konfirmuar në mënyrë të përsëritur se 36-vjeçarja mbahet në një burg në Alepo.

Ajo është parë për herë të fundit në mesin e janarit, kur, sipas dëshmitarëve okularë, ishte strehuar bashkë me persona të tjerë në një ndërtesë gjatë përplasjeve mes forcave siriane dhe atyre kurde.

Sipas të njëjtëve dëshmitarë, Eva Maria Michelmann dhe kolegu i saj turk, Ahmet Polat, u arrestuan nga forcat siriane dhe më pas u zhdukën.

Zyra ligjore bën të ditur se një luftëtar i liruar nga Forcat Demokratike Siriane ka deklaruar se kishte takuar Ahmet Polat, të cilin e njihte edhe para arrestimit, gjatë kohës që ishte në paraburgim, por nuk kishte parë gazetaren.

Megjithatë, gra të tjera të ndaluara kanë raportuar se një “gazetare gjermane” mbahej bashkë me rreth 40 gra të tjera.

“Kjo mund të jetë vetëm Eva Maria Michelmann, pasi nuk ka raportime të njohura për ndonjë gazetare tjetër gjermane të ndaluar në Siri”, thuhet në deklaratën e zyrës ligjore. Sipas dëshmive, në burg janë raportuar gjithashtu keqtrajtime dhe mungesë ushqimi.

Zyra ligjore ka informuar tashmë Ministrinë e Jashtme. Në një deklaratë për gazetën ZEIT, avokati Roland Meister, njëherazi edhe vëllai i gazetares së zhdukur, u shpreh se as familja dhe as ambasada gjermane nuk janë njoftuar nga qeveria kalimtare siriane.

“Qeveria federale dhe Ministria e Jashtme duhet tani të sigurojnë kontakt me motrën time dhe lirimin e saj, pa u ndikuar nga interesat tregtare”, theksoi Meister, duke shtuar se Ministria e Jashtme ka deklaruar se po punon “me urgjencë të lartë” për të sqaruar situatën.

Nga ana tjetër, qeveria siriane mohon se po e mban Michelmann, ndërsa një raport i OKB-së në muajin mars ka përmendur 24 raste të ngjashme.