Hamza e quan pazar ofertën e Kurtit: Pozitat s’janë formë e këmbimit ‘mall me mall’

Lajme

Gazeta Express

20/04/2026 22:14

Kryetari i Partisë Demokratike të Kosovës ka dhënë detaje për ofertën që kryeministri i vendit, Albin Kurti i ka bërë atij lidhur me çështjen e presidentit të vendit.

Në Rubikon të Klan Kosovës, Hamza ka thënë se ofrimi i pozitës së kryeparlamentarit për PDK-në, që ky subjekt ta votojë presidentin e vendit, sipas tij, është joserioze.

“Nuk është serioze. Vendi nuk është duke shkuar në zgjedhje për kryetar Kuvendi. Kuvendi ka kryetaren, Kuvendi është i konstituuar. Nuk jemi shku me pas pazare politike dhe këmbim të pozitave. Nuk është në atë formën e këmbimit mall me mall, merre këtë, po ta jepi këtë. Ose ama postin e nënkryetarit po ta jepi postin e kryetarit. Nuk është serioze, e as kushtetuese”, ka thënë Hamza.

Ai ka shtuar se PDK-ja ka kontribuar në të gjitha proceset, përfshirë edhe atë të zgjidhjes së çështjes së presidentit.

“Ne e kemi depolarizu skenën politike. Ne kemi garu me program, por jo me fyerje, me sharje, me linçime e me ofendime.”, ka thënë tutje ai, duke shtuar se normalisht që gjatë opozitbërjes i kanë përmendur mangësitë dhe dështimet e qeverisjes së Kurtit.