Sulm me armë në Kiev – Një person hap zjarr dhe merr pengje, të paktën pesë të vrarë e disa të plagosur

Lajme

Gazeta Express

18/04/2026 18:29

Të paktën pesë persona janë vrarë dhe të tjerë janë plagosur pasi një person hapi zjarr në Kiev, ka thënë presidenti i Ukrainës, Volodymyr Zelensky.

Ngjarja ndodhi në distriktin jugor Holosiivskyi të kryeqytetit, njoftoi policia e Kievit. Sipas raportimeve, burri fillimisht qëlloi mbi njerëzit në rrugë dhe më pas mori pengje në një supermarket aty pranë, raporton BBC, përcjell Gazeta Express.

Ministri i Brendshëm i Ukrainës, Ihor Klymenko, tha se sulmuesi qëlloi ndaj policisë nga brenda supermarketit para se të vritej nga forcat e rendit.

Numri i saktë i viktimave mbetet i paqartë, por kryetari i Kievit tha se të paktën 15 persona janë plagosur. Dhjetë prej tyre, përfshirë një fëmijë, janë dërguar në spital.

Prokurori i përgjithshëm i Ukrainës, Ruslan Kravchenko, tha se katër nga të vrarët u qëlluan në rrugë dhe një në supermarket.

Ai e identifikoi sulmuesin si një burrë 58-vjeçar nga kryeqyteti rus, Moska, dhe tha se kishte përdorur një armë automatike për të kryer sulmin vdekjeprurës.

Katër pengjet që ai mori u liruan më vonë, sipas Zelenskyt.

Kravchenko gjithashtu tha se një zjarr shpërtheu në apartamentin e burrit, pas raportimeve të pakonfirmuara se ai kishte shpërthyer një mjet eksploziv.