Trump e quajti të ‘‘tmerrshëm në politikën e jashtme’’, Papa thotë se ‘‘s’është i interesuar’’ të debatojë me presidentin amerikan

Lajme

Gazeta Express

18/04/2026 18:18

Papa Leo ka minimizuar kritikat e drejtpërdrejta ndaj Donald Trump pas një përplasjeje shumë të komentuar mes dy liderëve.

Presidenti amerikan e ka sulmuar vazhdimisht Papa Leon ditët e fundit dhe e ka akuzuar se mbështet përpjekjet e Iranit për të siguruar një armë bërthamore, raporton SkyNews, përcjell Gazeta Express.

Të enjten, kritikoi ashpër liderët që shpenzojnë miliarda për luftëra dhe tha se bota po “shkatërrohet nga një grusht tiranësh” gjatë turneut të tij në vendet afrikane, por Trumpi nuk u përmend.

I pyetur për komentet e tij nga gazetarët gjatë fluturimit drejt Angolës, papa tha:

“Siç ndodhi, u interpretua sikur po përpiqesha të debatoja me presidentin, gjë që nuk është aspak në interesin tim.”

Ai tha se fjalimi ishte përgatitur dy javë më parë, “shumë përpara se presidenti të komentonte për mua dhe për mesazhin e paqes që po promovoj”.

Raportimi i komenteve që papa ka bërë gjatë turneut “nuk ka qenë i saktë në të gjitha aspektet”, tha Leo.

Trump lëshoi një seri sulmesh verbale dhe në rrjetet sociale kundër Papa Leos më herët këtë javë, përfshirë një postim në Truth Social ku e quajti pontifin “TË DOBËT ndaj krimit dhe të tmerrshëm për politikën e jashtme”.

Presidenti amerikan gjithashtu publikoi një imazh të gjeneruar me AI të vetes si një figurë e ngjashme me Jezusin, duke shkaktuar kritika të gjera përpara se postimi të hiqej.