“Të shohim nëse është burrë mjaftueshëm për ta pranuar se çka ka thënë”, Stanisic me akuza drejt yllit të Real Madridit

Futboll

Gazeta Express

16/04/2026 17:19

Mbrojtësi i Bayern Munich, Josip Stanisic, nuk është i kënaqur me sjelljen e lojtarit të Real Madrid, Antonio Rudiger, duke e quajtur atë “të papranueshme” pas një përplasjeje të ashpër në ndeshjen e dytë çerekfinale të Ligës së Kampionëve. Mbrojtësi kroat u përfshi në një duel me Rudigerin pasi pretendoi për faull.

Në pjesën e parë, Stanisic u rrëzua gjatë aksionit që çoi në golin e Kylian Mbappe, i cili barazoi rezultatin për Real Madridin në përballjen e dyfishtë. Lojtarët e Bayernit kërkuan faull, por ai nuk u akordua, ndërsa Stanisic mbeti i shtrirë në tokë. Sipas tij, Rudiger iu afrua dhe e ofendoi dy herë, siç deklaroi për revistën gjermane “Kicker”.

Pas ndeshjes, Stanisic tha se nuk dëshiron të hyjë në detaje, por theksoi se sjellja e Rudigerit ishte e papranueshme: “Mund ta pyesni atë, ndoshta është mjaft burrë për ta pranuar. Nuk dua të krijoj armiqësi dhe nuk e marr personalisht, sepse këto gjëra ndodhin në nxehtësinë e momentit, por nuk është e pranueshme.”

Ky incident vjen pak më shumë se një muaj pasi Rudiger u kritikua ashpër për një ndërhyrje ndaj Diego Rico në një ndeshje ndaj Getafe, ku u pretendua se e kishte goditur me qëllim. Vetë Rudiger kishte deklaruar më pas se, nëse do të kishte dashur ta lëndonte, ai “do të ishte ende i shtrirë në tokë”. Ndërkohë, trajneri i Real Madridit, Alvaro Arbeloa, e kishte mbrojtur atë, duke e quajtur shembull për lojtarët e rinj.

Ngjarja në Mynih ishte pjesë e një fundi të tensionuar të rrugëtimit evropian, ku Arda Guler u ndëshkua me karton të kuq për protesta pas përfundimit të ndeshjes.