CNN: Telefonata mes liderëve të Izraelit dhe Libanit do të ishte historike, tash duhen rezultate

Lajme

Gazeta Express

16/04/2026 11:53

Një telefonatë e drejtpërdrejtë mes udhëheqësve të Izraelit dhe Libanit pa dyshim do të ishte një moment historik në Lindjen e Mesme moderne, veçanërisht në mes të konflikteve të vazhdueshme në Iran, Gaza dhe në vetë Libanin, shkruan CNN.

Vitet e konfliktit, që përfshijnë edhe okupimin e jugut të Libanit nga Izraeli nga viti 1982 deri në vitin 2000, nënkuptojnë se të dyja palët nuk kanë lidhje diplomatike.

Por pyetja është nëse kjo telefonatë do të sjellë rezultate reale, ndërsa SHBA po shtyn për një armëpushim mes Izraelit dhe Libanit, dhe potencialisht për një marrëveshje më të gjerë paqeje. Kryeministri izraelit Benjamin Netanyahu dhe Presidenti i Libanit Joseph Aoun pritet të flasin të enjten, megjithëse koha e telefonatës mbetet e paqartë. Presidenca e Libanit ende nuk ka komentuar.

Lufta mes Izraelit dhe Hezbollahut në Liban është ende një konflikt aktiv – Izraeli po kryen sulme vdekjeprurëse ndërsa proksi iranian lëshon raketa dhe dronë.

Por Presidenti Donald Trump kërkon armëpushim, duke ushtruar së fundmi presion ndaj Izraelit që t’i zvogëlojë sulmet në Liban. Izraeli, i cili prej kohësh është skeptik për vullnetin ose aftësinë e qeverisë libaneze për t’u përballur me Hezbollahun, ka vendosur një prag të lartë për një marrëveshje, duke përfshirë çarmatimin e Hezbollahut.

SHBA organizoi bisedime të drejtpërdrejta mes Izraelit dhe Libanit të martën, dhe kabineti i sigurisë i Izraelit diskutoi përarmëpushim të mërkurën në mbrëmje. Trump synon një marrëveshje më të gjerë me Iranin, dhe Teherani po kërkon ndalimin e luftimeve në Liban si pjesë e marrëveshjes.

Trump e njoftoi për herë të parë telefonatën mes Netanyahut dhe Aoun në rrjetet sociale, duke thënë se ajo mund të ofrojë “pak hapësirë frymëmarrjeje” mes Izraelit dhe Libanit. Ai gjithashtu tha se ka kaluar “rreth 34 vjet” që kur të dy udhëheqësit kishin folur, megjithëse nuk është e qartë se cilit kontakt apo bisede i referohej.

Në vitin 1982, kryeministri izraelit Menahem Begin u takua me presidentin e zgjedhur të Libanit Bachir Gemayel. Dy javë më vonë, Gemayel u vra.