Dramë në Superligë: Ballkani ndalet në fund, Drita forcon kreun, Drenica ringjall shpresat

Futboll

Gazeta Express

12/04/2026 17:17

Janë mbyllur ndeshjet e javës në Superliga e Kosovës, duke prodhuar rezultate interesante si në garën për titull ashtu edhe në luftën për mbijetesë.

Ballkani ndalet në sekondat e fundit

FC Ballkani ka bërë një hap fals në garën për titull, pasi ka barazuar 1-1 ndaj SC Gjilani.

Vendasit kaluan në epërsi herët, me golin e Almir Kryeziu në minutën e 12-të, duke dhënë sinjale për një fitore të rëndësishme. Megjithatë, kur gjithçka dukej e mbyllur, në minutën e 91-të kapiteni Armend Thaqi realizoi golin e barazimit për Gjilanin.

Ky rezultat e lë Ballkanin në vendin e dytë me 49 pikë, pesë më pak se lideri.

Drita nuk gabon, një hap larg titullit

FC Drita vazhdon marshimin drejt titullit, pasi mposhti KF Ferizaj me rezultat 2-1.

Mysafirët kaluan të parët në epërsi me golin e Kreshnik Shabani në minutën e 18-të. Reagimi i Dritës erdhi në minutën e 37-të me golin e Vesel Limaj, ndërsa fitorja u vulos në minutën e 82-të nga Liridon Balaj.

Me këtë triumf, Drita shkon në kuotën e 54 pikëve, duke ruajtur diferencën prej pesë pikësh ndaj Ballkanit dhe duke bërë një hap shumë të rëndësishëm drejt titullit kampion.

Drenica godet në transfertë dhe futet në lojë për mbijetesë

Në luftën për mbijetesë, KF Drenica ka arritur një fitore jetike ndaj KF Llapi me rezultat minimal 0-1.

Golin vendimtar e realizoi Kreshnik Uka në minutën e 70-të, duke i dhënë tri pikë shumë të vlefshme skuadrës së tij.

Me këtë fitore, Drenica arrin në 29 pikë dhe mbetet në zonën e rrezikut, por tashmë ka ngushtuar diferencën në vetëm tri pikë me Llapin dhe Ferizajn, duke rihapur plotësisht garën për mbijetesë. /GazetaExpress/