De Laurentiis shpërthen ndaj FIFA-s dhe UEFA-s

Futboll

Gazeta Express

11/04/2026 21:59

Presidenti i Napolit, Aurelio De Laurentiis, ka sulmuar ashpër institucionet kryesore të futbollit botëror, duke akuzuar FIFA dhe UEFA për mungesë transparence dhe padrejtësi financiare. Ai madje ka propozuar ndryshime radikale në rregullat e lojës për të tërhequr brezat e rinj.

De Laurentiis shprehu pakënaqësinë e tij për mënyrën se si shpërndahen të ardhurat nga turnetë ndërkombëtarë, duke theksuar se klubet – që paguajnë lojtarët – nuk përfitojnë sa duhet. Sipas tij, federatat mbajnë pjesën më të madhe të fitimeve dhe nuk tregojnë të vërtetën për mënyrën e shpërndarjes së tyre.

Ai kritikoi gjithashtu ngarkesën e kalendarit ndërkombëtar, duke argumentuar se klubet po shfrytëzohen nga ekipet kombëtare. Sipas tij, duhet të ketë një periudhë të vetme ndërkombëtare prej dy muajsh dhe federatat duhet të paguajnë për përdorimin e lojtarëve. Ai ngriti shqetësimin për mungesën e sigurimit të futbollistëve, duke kërkuar kompensim financiar për klubet në rast dëmtimi të lojtarëve gjatë ndeshjeve me kombëtaren.

“Lojtarët janë pasuri e klubit, jo e federatave,” theksoi ai, duke shtuar se është e padrejtë që klubet të humbasin shërbimet e tyre pa asnjë shpërblim.

Përtej çështjeve financiare, presidenti i Napolit beson se vetë loja ka nevojë për ndryshim. Ai propozoi një format të ri ndeshjeje, të ngjashëm me basketbollin, me kohë efektive loje dhe pjesë më të shkurtra, për ta bërë futbollin më tërheqës për brezin e ri që është mësuar me ritëm më të shpejtë.

Sipas tij, futbolli modern duhet të përshtatet me kohën dhe të kuptojë se tashmë është një industri e madhe, ku investimet janë të larta dhe kërkojnë menaxhim më të drejtë dhe më profesional. /GazetaExpress/