Reali dhe Arsenali sfidojnë njëri-tjetrin për “100-milionëshin” e Leverkusenit

Futboll

Gazeta Express

06/04/2026 21:20

Një nga talentët më premtues të Bundesligës ka tërhequr vëmendjen e klubeve më të mëdha në Evropë, dhe mund të jetë shumë pranë një transferimi që do t’i ndryshojë karrierën.

Bëhet fjalë për yllin e Bayer Leverkusenit, Christian Kofani (19 vjeç), një emër ende jo shumë i njohur, por që konsiderohet si një “diamant” i zbuluar nga klubi gjerman.

Sulmuesi kamerunas u transferua te Leverkusen për vetëm 5.25 milionë euro nga Albacete.

Para kalimit te Albacete, ai nuk kishte luajtur asnjë minutë futboll profesional, por arriti të shpërthejë shpejt, duke shënuar tetë gola në divizionin e dytë spanjoll.

Aktualisht, Kofani vlerësohet rreth 40 milionë euro dhe ka bërë paraqitje mbresëlënëse edhe në Ligën e Kampionëve, duke tërhequr interesin e klubeve si Arsenali dhe Real Madridi.

Pas një periudhe përshtatjeje në Gjermani, ai është shndërruar nga një zëvendësues i rëndësishëm në një titullar të rregullt, duke nisur 10 nga 27 ndeshjet e tij, përfshirë 5 nga 7 të fundit.

Ai ka realizuar 5 gola dhe 4 asistime në Bundesliga, duke u renditur ndër adoleshentët më produktivë në Evropë.

Ajo që e veçon Kofanin nuk është vetëm aftësia për të shënuar, por edhe forca fizike dhe mënyra si krijon hapësira për shokët e skuadrës.

Ai konsiderohet një lojtar i rrallë për shkak të intensitetit në duele dhe inteligjencës në lëvizje, që shkon përtej moshës së tij.

Leverkuseni pritet të kërkojë rreth 60–70 milionë euro për kartonin e tij këtë verë, një shifër që mund të trembë disa klube për shkak të mungesës së përvojës.

Megjithatë, interesi mbetet i madh.

Përveç Real Madridit, edhe Bayern Munich po e ndjek nga afër, ndërsa në Premierligë ka disa klube që e monitorojnë situatën.

Agjenti i tij, Eric Debolo, ka konfirmuar interesin e Arsenalit, duke përmendur edhe trajnerin Mikel Arteta si admirues të madh të lojtarit.

“Po, interesi i Arsenalit është real. Arteta e pëlqen shumë dhe kemi kontakte direkte. Ai është një lojtar 100 milionë eurosh dhe me të, Arsenali do të ketë një sulmues të nivelit të lartë për 10 vitet e ardhshme”.

Ai shtoi se Kofani është aktualisht një nga sulmuesit më të kompletuar nën moshën 21 vjeç në Evropë, duke përmendur shpejtësinë, teknikën, aftësitë mbrojtëse dhe lojën në ajër.

Bayer Leverkuseni vazhdon të luftojë për një vend në Evropë këtë sezon, por Kofani mund të jetë talenti i radhës që klubi shet për një shumë të madhe./GazetaExpress/