Kimmich flet për atmosferën në “Bernabeu”: Tifozët këtu janë të veçantë

Futboll

Gazeta Express

06/04/2026 20:35

Ylli i Bayern Munichut, Joshua Kimmich, ka theksuar se skuadra e tij duhet të imponojë stilin e lojës për të marrë një rezultat pozitiv ndaj Real Madridit në ndeshjen e së martës.

Në konferencën për shtyp para çerekfinales së parë të Ligës së Kampionëve, ai u shpreh: “Në përgjithësi, duam të lëmë gjurmën tonë në çdo ndeshje. Real Madridi ka një stil unik dhe mund të jetë i rrezikshëm në çdo situatë. Do të jetë e rëndësishme të imponojmë pikat tona të forta në fushë, dhe sigurisht do të përshtatemi disi me stilin e tyre”.

Duke folur për përballjen e fundit me “Los Blancos”, Kimmich tha se këtë vit do të bëjnë më mirë.

“Pas ndeshjes së parë mendova se mund të kishim fituar me diferencë më të madhe; në të dytën, Real Madridi ishte qartësisht më i mirë, por pastaj Alphonso Davies na dha epërsinë me një gol fantastik. U kthyem në fushë duke ndjerë se mund të kishim bërë më mirë. Megjithatë, këtë vit nuk kemi lojtarë të dëmtuar, gjë që ka qenë problem i vazhdueshëm kur kemi ardhur këtu, dhe jemi shumë të lumtur që të gjithë janë në formë”, shtoi ai.

Për atmosferën në “Bernabeu”, ai shtoi: “Atmosfera dhe tifozët këtu janë vërtet të veçantë. Kemi ardhur shumë herë me synime të mira, por jemi larguar të zhgënjyer. Këtë herë, ndeshja e kthimit do të luhet në Munich, dhe kjo është një avantazh për ne”.

Kimmich theksoi gjithashtu rëndësinë e Harry Kane për ekipin.

“Ai është jashtëzakonisht i rëndësishëm për ne. Nuk është vetëm golashënues, por edhe lider dhe shembull për të tjerët. Ka një mentalitet unik për një lojtar sulmues. Është shumë e rëndësishme që ai të jetë në fushë nesër”, u shpreh ai.

Ai i komentoi edhe ndeshjet e Real Madridit kundër Manchester Cityt.

“Nuk i kam parë ndeshjet, por ky është Real Madridi dhe gjërat ndonjëherë janë ndryshe këtu. Ndoshta prisnim që City të dominonte, por ishte interesante të shihje Realin të kualifikohej. Ata janë përballur shpesh dhe Reali ka kaluar disa herë edhe kur dukej se nuk e meritonte, por këtë herë kualifikimi i tyre ishte i merituar”, vazhdoi Kimmich.

Për sekretin e fitores ndaj Real Madridit, ai theksoi: “Nëse do ta mposhtësh Real Madridin, duhet të jesh në nivelin maksimal, si mentalisht ashtu edhe taktikisht. Të gjithë jemi të emocionuar që do të luajmë këtu. Ky është niveli më i lartë i garës, për të cilin ëndërrojmë si lojtarë”.

Në fund, ai foli edhe për Kylian Mbappen.

“Ai mund të ndihmojë çdo ekip, sepse ka cilësi individuale të jashtëzakonshme dhe është kapiten i Francës. Ka vendosur shumë ndeshje këtë sezon, edhe kur Real Madrid ka kaluar momente të vështira. Është një armë vdekjeprurëse; kam luajtur disa herë kundër tij dhe e dimë çfarë të presim”, e mbylli ai./GazetaExpress/