Patch-et hormonale mund të trajtojnë kancerin e prostatës

Keshilla Mjekësore

Gazeta Express

26/03/2026 20:23

Patch-et hormonale, të përdorura zakonisht për menopauzën tek gratë, mund të ofrohen edhe për burrat si trajtim për kancerin e prostatës, sipas një studimi të madh shkencor.

Studiuesit zbuluan se këto patch-e funksionojnë po aq mirë sa injeksionet hormonale tradicionale në ndalimin e përparimit të sëmundjes, por me më pak efekte anësore dhe pa nevojën për vizita të shpeshta në spital.

Kanceri i prostatës është ndër më të përhapurit, me dhjetëra mijëra raste çdo vit, por ndryshe nga disa kancere të tjera, ende nuk ka një program kombëtar depistimi në shumë vende.

Shkencëtarët nga University College London testuan nëse patch-et hormonale mund të zëvendësojnë injeksionet tek pacientët me kancer që është përhapur pak përtej prostatës. Këta pacientë zakonisht trajtohen me terapi hormonale për të ulur nivelin e testosteronit, hormon që ndihmon rritjen e kancerit.

Studimi, i publikuar në New England Journal of Medicine, përfshiu 1,360 burra me moshë mesatare 72 vjeç. Disa morën injeksione standarde që bllokojnë testosteronin, ndërsa të tjerë përdorën patch-e që çlirojnë oestradiol – një formë e hormonit femëror estrogjen – përmes lëkurës, duke ulur indirekt testosteronin.

Rezultatet treguan se patch-et ishin po aq efektive sa injeksionet në kontrollin e sëmundjes.

Ndërkohë, injeksionet hormonale shpesh shkaktojnë efekte anësore si afshe të nxehta, dobësim të kockave dhe rritje të rrezikut për sëmundje të zemrës. Patch-et, në krahasim, shkaktuan më pak nga këto probleme.

Megjithatë, ato u shoqëruan me një rrezik më të lartë për zmadhim të dhimbshëm të indeve të gjoksit tek burrat (gjinekomasti).

Ekspertët theksojnë gjithashtu se kjo metodë është shumë më praktike, pasi patch-et mund të përdoren në shtëpi, ndërsa injeksionet kërkojnë vizita të rregullta te mjeku.

Autorja kryesore e studimit, Ruth Langley, u shpreh se këto gjetje mund t’u japin pacientëve më shumë zgjedhje në trajtim dhe të përmirësojnë cilësinë e jetës, sidomos për ata që vuajnë nga efektet anësore të terapive aktuale.

Edhe ekspertë nga organizata si Cancer Research UK dhe Prostate Cancer UK vlerësuan se trajtimi i ri jo vetëm që është efektiv, por edhe më i lehtë dhe më pak invaziv për pacientët.

Nga ana tjetër, debati mbi depistimin e kancerit të prostatës vazhdon. Testi PSA, i përdorur aktualisht, nuk është gjithmonë i saktë dhe mund të çojë në trajtime të panevojshme.

Një studim i ri në Mbretërinë e Bashkuar, i quajtur Transform trial, po shqyrton nëse kombinimi i testeve gjenetike dhe skanimeve të avancuara mund të krijojë një program më të besueshëm depistimi në të ardhmen.

Nëse këto zhvillime konfirmohen, ato mund të sjellin ndryshime të rëndësishme në trajtimin dhe diagnostikimin e kësaj sëmundjeje, duke u dhënë pacientëve mundësi për jetë më të gjatë dhe më cilësore. /GazetaExpress/