‘O shot’: Trajtimi intim që mund të përmirësojë jetën seksuale të grave

Keshilla Mjekësore

Gazeta Express

25/03/2026 20:40

Një studim i ri sugjeron se gratë që përballen me probleme seksuale mund të përfitojnë nga një trajtim i njohur si “O shot”.

Kjo procedurë, e quajtur shpesh edhe “rinovim vaginal”, përdor plazmë të pasur me trombocite (PRP), e marrë nga gjaku i vetë pacientes, për të stimuluar rigjenerimin e indeve. Qëllimi është forcimi i muskujve dhe përmirësimi i lubrifikimit, ndjeshmërisë dhe funksionit seksual.

Ekspertët thonë se trajtimi mund të ndihmojë shumë gra që vuajnë nga simptoma si thatësi vaginale, dhimbje gjatë marrëdhënieve seksuale, ulje e dëshirës seksuale dhe infeksione të përsëritura urinare – shpesh të lidhura me periudhën para menopauzës.

Studimi, i publikuar në revistën Obstetrics & Gynecology, ndoqi 52 gra seksualisht aktive, të moshës 18–50 vjeç, për një periudhë gjashtëmujore. Ato u ndanë rastësisht në dy grupe: njëri mori një injeksion PRP, ndërsa tjetri një injeksion placebo me solucion fiziologjik.

Injeksionet u aplikuan në disa pika pranë hyrjes vaginale. Gratë nuk e dinin se cilin trajtim kishin marrë.

Rezultatet treguan se gratë që morën PRP raportuan përmirësime më të mëdha në funksionin seksual pas gjashtë javësh dhe pas gjashtë muajsh, krahasuar me grupin placebo. Ato raportuan gjithashtu rritje të dëshirës seksuale, eksitimit, lubrifikimit dhe më shumë orgazma.

Megjithatë, studiuesit theksuan se diferencat nuk ishin statistikisht të rëndësishme krahasuar me grupin kontrollues. Pavarësisht kësaj, rreth 70% e grave që morën PRP raportuan përmirësim subjektiv pas vetëm gjashtë javësh, krahasuar me 42% të atyre që morën placebo.

Procedura përfshin marrjen e një sasie gjaku nga krahu i pacientes, e cila përpunohet në centrifugë për të ndarë plazmën e pasur me faktorë rritjeje. Këta faktorë ndihmojnë në rigjenerimin e qelizave kur riinjektohen në trup.

Rënia e dëshirës seksuale është e zakonshme gjatë periudhës së perimenopauzës (5–10 vjet para menopauzës), kur nivelet e hormoneve si estrogjeni bien ndjeshëm. Kjo ndikon në humor, rrjedhjen e gjakut dhe strukturën e indeve vaginale, duke shkaktuar thatësi, irritim dhe dhimbje gjatë seksit.

Edhe pse shumë gra raportojnë përmirësim, trajtimi PRP ende konsiderohet eksperimental dhe nuk ofrohet në sistemin publik shëndetësor. Çmimet në klinikat private variojnë nga rreth 250 deri në mbi 1,500 paund për trajtim.

Ekspertët paralajmërojnë se, ndonëse mund të rrisë ndjeshmërinë, ky trajtim nuk zgjidh gjithmonë dhimbjen gjatë marrëdhënieve, e cila shpesh lidhet me mungesën e estrogjenit.

Ndërkohë, terapia zëvendësuese hormonale (HRT) mbetet një nga trajtimet kryesore për simptomat e menopauzës, megjithëse shumë gra hezitojnë ta përdorin për shkak të shqetësimeve të mëparshme për rrezikun e kancerit të gjirit. /GazetaExpress/