40 vjeç? Pesë shenja që s’duhen neglizhuar

Keshilla Mjekësore

Gazeta Express

27/02/2026 19:08

Mbushja e moshës 40 vjeç sjell ndryshime natyrale në organizëm, por disa simptoma nuk duhen justifikuar thjesht si “shenjë e moshës”.

 Dr. Reem Hasan, mjeke e NHS dhe Drejtore Mjekësore në Vista Health, paralajmëron se disa shenja mund të tregojnë probleme më serioze shëndetësore dhe kërkojnë vlerësim mjekësor.

Sipas saj, vonesa për t’u kontrolluar shpesh lidhet me pasigurinë dhe jo me neglizhencën. Ja pesë simptomat që duhen marrë seriozisht:

1. Lodhje e vazhdueshme

Ndjesia e rraskapitjes për javë të tëra nuk është pjesë normale e plakjes. Mund të lidhet me mungesë hekuri, probleme me tiroiden, apne gjumi, depresion, inflamacion kronik apo, më rrallë, sëmundje më të rënda. Nëse lodhja zgjat më shumë se disa javë, kërkohet vlerësim i plotë.

2. Rënie në peshë pa arsye

Humbja e peshës pa dietë apo aktivitet shtesë fizik nuk duhet injoruar. Shkaqet mund të përfshijnë tiroiden hiperaktive, diabetin, çrregullime të tretjes, infeksione apo edhe kancer. Nëse humbni mbi 5% të peshës trupore brenda 6–12 muajve pa shpjegim, duhet konsultë mjekësore.

3. Dhimbje të reja ose të vazhdueshme

Dhimbjet në gjoks, bark, shpinë apo kocka që zgjasin nuk duhen “përballuar” pa kontroll. Edhe pse shpesh janë beninje, ato mund të sinjalizojnë sëmundje të zemrës, probleme me tëmthin, artrit, fraktura apo, në disa raste, kancer. Çdo dhimbje që zgjat mbi tre javë pa shkak të qartë duhet kontrolluar.

4. Ndryshime në jashtëqitje ose urinim

Kapsllëk apo diarre e re dhe e vazhdueshme, gjak në feçe, urinim i shpeshtë ose vështirësi në urinim kërkojnë vlerësim. Shkaqet mund të jenë të thjeshta (hemorroide, infeksione), por edhe më serioze si sëmundje të zorrëve, probleme të prostatës apo kancer.

5. Probleme me kujtesën

Harrimi i rastësishëm mund të jetë normal, por përkeqësimi i kujtesës, konfuzioni apo ndryshimet në të menduar që ndikojnë jetën e përditshme nuk duhen neglizhuar. Shkaqet variojnë nga stresi dhe mungesa e gjumit, deri te mungesat vitaminike, çrregullimet e tiroides, infeksionet apo sëmundjet neurologjike. Vlerësimi i hershëm ndihmon në diagnozë dhe trajtim më efektiv.

Dr. Hasan foli në kuadër të fushatës “Signs of Clarity” të Vista Health, e cila synon të ndihmojë personat në moshë të mesme të dallojnë shenjat paralajmëruese dhe të veprojnë në kohë.

Sipas të dhënave të publikuara nga Vista Health, 54% e të rriturve në moshë të mesme pranojnë se i kanë injoruar fillimisht simptomat, mesatarisht për rreth 14 muaj, ndërsa 77% raportojnë simptoma të përsëritura. Problemet më të zakonshme përfshijnë vështirësi me gjumin, dhimbje kyçesh, lodhje të vazhdueshme, dhimbje të pashpjegueshme dhe ndryshime në tretje.

Ajo thekson se hezitimi për të kërkuar ndihmë nga mjeku mund të ketë pasoja serioze. Disa sëmundje, përfshirë kancerin, bëhen më të shpeshta në moshën e mesme. Kanceri i zorrës së trashë prek si burrat ashtu edhe gratë dhe është ndër më të shpeshtët në Mbretërinë e Bashkuar. Kanceri i gjirit mbetet më i zakonshmi te gratë, ndërsa kanceri i prostatës është aktualisht më i shpeshti te burrat.

Për kancerin e prostatës nuk ekziston një program kombëtar depistimi, ndaj burrat duhet të jenë të vëmendshëm ndaj simptomave dhe të kërkojnë këshillë mjekësore kur është e nevojshme.

Mesazhi përfundimtar është i qartë: nëse një simptomë vazhdon, përkeqësohet ose thjesht “nuk duket normale”, konsultohuni me mjekun. Kontrolli i rregullt dhe reagimi i hershëm janë ndër mënyrat më efektive për të zbuluar problemet në fazë të hershme. /GazetaExpress/