Përplasje mes Ministrit Filkov dhe avokatit Dimoski: Përgjegjësia për Artan Grubin nuk është te gjykatat

Maqedoni

Gazeta Express

25/02/2026 11:04

Ministri i Drejtësisë, Igor Filkov, ka kërkuar publikisht një llogaridhënie të detajuar dhe transparente nga të gjithë akterët e përfshirë në procedurën gjyqësore ndaj ish-zëvendëskryeministrit Artan Grubi, duke insistuar që përgjegjësia për masat e shqiptuara të identifikohet me emër dhe mbiemër.

Megjithatë, kjo thirrje ka nxitur një reagim të ashpër nga avokati Vojo Dimoski, i cili përmes rrjeteve sociale e ka akuzuar ministrin për mosnjohje totale të ligjeve dhe procedurave penale. Dimoski ka sqaruar se kërkesa e Filkovit për të hetuar punën e gjyqtarit që nuk caktoi paraburgim efektiv është e pakuptimtë, pasi gjykata nuk mund të vendosë masë më të rëndë sesa ajo që ka kërkuar vetë Prokuroria, e cila në këtë rast kishte propozuar vetëm arrest shtëpiak.

Sipas avokatit, përgjegjësia e vërtetë nuk duhet kërkuar te gjyqësori, por te dega ekzekutive, përkatësisht te Ministria e Punëve të Brendshme dhe Agjencia për Siguri Kombëtare , të cilat kanë dërguar opinione zyrtare se paraburgimi efektiv në burg nuk ishte i sigurt për Grubin. Në fund të reagimit të tij, Dimoski ka përdorur edhe një gjuhë ironike, duke thënë se ndonëse stili i ministrit është gjithmonë i rregullt, ai duhet të përkujdeset më shumë për qartësinë e mendimeve dhe njohuritë juridike sesa për dukjen e tij.