Shefi i gjyqtarëve në Itali: Goli i Napolit u anulua gabim, penalltia s’ishte

Futboll

Gazeta Express

24/02/2026 16:40

Shefi i arbitrave, Dino Tommasi, pranon se goli i dytë i Napoli kundër Atalanta duhej të ishte pranuar, por thekson se ishte e drejtë që penalltia për “Partenopeit” u anulua pas kontrollit me VAR.

Tommasi, anëtar i komisionit italian për caktimin e arbitrave, dha vlerësimin e tij për incidentet e diskutueshme në humbjen 2-1 të Napolit ndaj Atalantës të dielën.

Napolit iu anulua një penallti në pjesën e parë pas rishikimit me VAR, ndërsa arbitri Daniele Chiffi gjithashtu anuloi golin e dytë të shënuar nga Miguel Gutiérrez në pjesën e dytë.

Vendimi i arbitrit zemëroi drejtuesit e Napolit, të cilët dërguan drejtorin Giovanni Manna para mediave për t’u ankuar.

Megjithatë, Tommasi beson se penalltia e pjesës së parë u anulua me të drejtë.

“Është një vendim korrekt; nuk është faull. Rasmus Højlund shkon në kërkim të kontaktit, ndërsa Isak Hien qëndron në vend,” tha Tommasi për “DAZN” përmes Gianluca Di Marzio.

“Chiffi ishte shumë mirë i pozicionuar, por pati një perceptim të gabuar. Më pas e korrigjoi veten me rishikimin. Gianluca Aureliano dhe Aleandro Di Paolo në VAR punuan mirë.”

Nga ana tjetër, vendimi për të anuluar golin e dytë të Napolit për një faull të pretenduar të Højlund ndaj Hien u konsiderua i gabuar.

“Højlund i paraprin Hien; është shumë pak për ta konsideruar faull,” tha Tommasi përmes “ANSA”.

“Është një gabim në fushë, por roli qendror i arbitrit është i rëndësishëm. Me një vendim të saktë në fushë, gjithçka do të kishte qenë ndryshe. Në këtë ndeshje, Chiffi mbajti një prag shumë të lartë teknik, duke fishkëllyer shumë pak, edhe në ndërhyrje të forta. Ai lejoi lojën të vazhdonte, ndërsa në rastin e penalltisë dhe në këtë episod, e uli ndjeshëm pragun.”

Humbja ndaj Atalantës e lë Napolin në vendin e tretë në Serie A, me 50 pikë, po aq sa AS Roma./GazetaExpress/