Zelensky me një video nga bunkeri ku punoi në fillim të luftës i bën thirrje Trumpit ta vizitojë Kievin

Lajme

Gazeta Express

24/02/2026 11:40

Presidenti ukrainas Volodymyr Zelenskyy i ka bërë thirrje homologut të tij amerikan Donald Trump të vizitojë Kievin, në një video-mesazh në katërvjetorin e pushtimit të plotë nga Vladimir Putin, dhe ka deklaruar se Ukraina nuk do ta tradhtojë popullin e saj në asnjë negociatë me Rusinë.

Zelensky tha se Putini nuk i ka arritur qëllimet e tij fillestare të luftës dhe nuk e ka “thyer popullin ukrainas”. “Ai nuk e ka fituar këtë luftë,” u shpreh ai. “Ne e kemi ruajtur Ukrainën dhe do të bëjmë gjithçka për të arritur paqen. Dhe për të siguruar drejtësi.”

Fjalimi 18-minutësh përfshinte pamje të publikuara për herë të parë nga bunkeri nëntokësor në Rrugën Bankova në Kiev, ku Zelenskyy dhe këshilltarët e tij punuan dhe fjetën gjatë orëve të para pas sulmit të Rusisë në vitin 2022.

Zelensky kujtoi një telefonatë që kishte marrë nga Joe Biden, i cili i kishte ofruar ndihmë për t’u larguar nga vendi “urgjentisht”. “Unë iu përgjigja se më duhen municione, jo një udhëtim”, tha Zelenskyy, duke rikujtuar një nga momentet më të famshme të presidencës së tij.

Videoja tregonte Zelenskyyn duke vendosur trëndafila në një memorial në Sheshin Maidan në Kiev, në nderim të mijëra ushtarëve dhe ushtareve ukrainase që kanë humbur jetën gjatë katër viteve të fundit. Gjithashtu shfaqeshin pamje të liderëve botërorë që vizitonin Kievin, përfshirë Keir Starmer dhe Boris Johnson.

Zelenskyy tha: “Unë vërtet dua të vij këtu një ditë me presidentin e Shteteve të Bashkuara. E di me siguri: vetëm duke ardhur në Ukrainë, duke parë me sytë e vet jetën dhe luftën tonë, duke ndier popullin tonë dhe përmasat e kësaj dhimbjeje – vetëm atëherë mund të kuptohet se për çfarë bëhet fjalë në këtë luftë”.

Një vizitë në Ukrainë mund t’ia bëjë të qartë Trumpit “kush është agresori këtu dhe kush duhet të vihet nën presion,” sugjeroi Zelenskyy. Ai vazhdoi: “Kjo nuk është një sherr rrugësh – është një sulm nga një shtet i sëmurë ndaj një shteti sovran. Ai [Putini] është shkaku i fillimit të saj dhe pengesa për përfundimin e saj. Dhe është Rusia ajo që duhet t’i tregohet vendi. Që të ketë paqe të vërtetë”.