Ushtrimi fizik ul nervozizmin dhe ankthin

Keshilla Mjekësore

Gazeta Express

23/02/2026 19:02

Një studim sugjeron se personat që janë fizikisht më të përgatitur e humbasin më rrallë qetësinë në situata stresuese.

Studiues nga Universiteti Federal i Goias në Brazil zbuluan se një nivel më i lartë i aftësisë kardiorespiratore – pra aftësia e trupit për të furnizuar me oksigjen organet gjatë aktivitetit fizik – lidhet me më pak ankth dhe zemërim, si dhe me qëndrueshmëri më të madhe emocionale.

Për ta testuar këtë lidhje, ata kryen një eksperiment me 40 të rinj të shëndetshëm, të ndarë në dy grupe: me formë fizike mbi mesataren dhe nën mesataren. Në dy seanca të ndryshme, pjesëmarrësve iu shfaqën imazhe neutrale (objekte të përditshme) ose imazhe të pakëndshme, si skena lëndimesh dhe situata kërcënuese, të dizajnuara për të nxitur stres dhe emocione negative.

Rezultatet treguan dallime të qarta në përballimin e stresit. Edhe pse të gjithë pjesëmarrësit raportuan rritje të tensionit pas pamjeve të pakëndshme, grupi me formë më të mirë fizike arriti të ruante shumë më tepër qetësinë. Në të kundërt, personat me formë më të dobët fizike kishin 775% më shumë gjasa që ankthi dhe zemërimi i tyre të kalonin nga nivel mesatar në nivel të lartë.

Studimi, i botuar në revistën Acta Psychologica, sugjeron gjithashtu se sa më e ulët të jetë forma fizike e një individi, aq më e madhe është prirja për të vepruar nën ndikimin e zemërimit në situata stresuese.

Autori kryesor i studimit, Dr. Thalles Guilarducci Costa, theksoi se gjetjet tregojnë qartë se individët me aftësi më të lartë kardiorespiratore shfaqin më pak ankth dhe më shumë reziliencë emocionale, duke forcuar provat se aktiviteti fizik luan një rol kyç në shëndetin emocional. /GazetaExpress/