Melania: kritika 11%, publiku 98%

Arte

Gazeta Express

17/02/2026 19:24

Filmi dokumentar për Melania Trump po shënon një dallim rekord mes kritikës dhe publikut. Në Rotten Tomatoes, kritikët i kanë dhënë vetëm 11%, ndërsa audienca e “biletave të verifikuara” e ka vlerësuar me 98%.

Një aksion i koordinuar i aktivistëve, apo shenja e polarizimit politik të kohës sonë?

Ky hendek ekstrem midis pikëve të kritikës profesionale dhe atyre të publikut nuk është i panjohur – shpesh filmi që merr më shumë çmime ose fiton më shumë para nuk përputhet me pëlqimin e kritikëve.

Por dallimi mes vlerësimeve të ashpra për Melania (“Eksperienca më depresive që kam pasur në kinema” – Mark Kermode) dhe komenteve entuziaste të publikut (“Çdo amerikan duhet ta shohë këtë film për të kuptuar hijeshinë dhe fuqinë e Flotius [sic]” – Jackie) duket pothuajse surreal.

Me një diferencë prej 87% mes kritikeve dhe publikut, Melania pritet të mbetet filmi me hendekun më të madh mes pikëve të kritikëve dhe audiencës. Më parë, rekordi mbahej nga Five Nights at Freddy’s 2, ku kritikët dhanë 16%, por audienca 84%. Përpara tij, filmi me hendekun më të madh ishte Emilia Pérez (2024): 70% për kritikët, 17% për publikun.

Analizat tregojnë dy tendenca kryesore: filmat që pëlqehen nga audienca shpesh janë të lehtë dhe të parashikueshëm, ndërsa filmat që dështojnë me publikun kanë shpesh protagoniste femra, çka mund të reflektojë paragjykime ideologjike ose kulturore.

 Filmat si Emilia Pérez, Under the Skin, ose disa superheroinat femra kanë përjetuar “bombardim” nga audienca në vlerësimet online.

Sigurisht, të dyja pikët duhet marrë me rezervë. Kritikët kanë një qasje më akademike, ndërsa komentuesit online shpesh janë të çuditshëm.

Por hendeku duket se do të qëndrojë dhe po rritet: nga 53% e Emilia Pérez, tek 68% e Five Nights at Freddy’s 2, deri tek 87% e Melania. Një rekord që duket e vështirë të thyehet.

Në thelb, filmi për Melania është më shumë se një dokumentar – ai është një pasqyrë e polarizimit të opinionit publik dhe ndikimit të politikës në perceptimin e kulturës popullore. /GazetaExpress/