Koreja e Veriut u jep strehë familjeve të ushtarëve të vrarë në luftën e Ukrainës

Lajme

Gazeta Express

17/02/2026 12:32

Koreja e Veriut ka thënë se ka përfunduar së ndërtuari një distrikt të ri strehimi në Penjan për familjet e ushtarëve koreanë të vrarë gjatë luftimeve krahas forcave ruse në Ukrainë, përpjekja më e re nga udhëheqësi Kim Jong-un për t’i nderuar të vdekurit e luftës.

Në fotografitë e publikuara nga mediat shtetërore shihet Kimi duke ecur nëpër një rrugë të re dhe duke i vizituar shtëpitë e disa prej familjeve bashkë me vajzën e tij, e cila besohet se quhet Kim Ju-ae, përderisa u zotua se do t’i shpaguante “martirët e rinj” të cilët “sakrifikuan gjithçka për mëmëdhenë e tyre”, shkruan gazeta “The Guardian”.

Kimi tha se distrikti i ri i banimit në zonën Hawasong të kryeqytetit i simbolizon “shpirtin dhe sakrificën” e ushtarëve të vdekur, duke shtuar se qëllimi i shtëpive të reja është që familjet “të jenë krenare me bijtë dhe bashkëshortët e tyre dhe të jetojnë të lumtura”.

Muajve të fundit, Koreja e Veriut e ka intensifikuar propagandën për t’i vlerësuar sa më lart ushtarët e dërguar për të luftuar në luftën e Rusisë kundër Ukrainës, përfshirë zbulimin e një kompleksi të ri përkujtimor në Penjan me skulptura ushtarësh. Analistët e shohin këtë si përpjekje për ta forcuar unitetin e brendshëm dhe për ta penguar pakënaqësinë e mundshme të popullit.

Kimi ka dërguar mijëra ushtarë e sasi të madhe të pajisjeve ushtarake, përfshirë artilerinë dhe raketat, muajve të fundit për ta mbështetur luftën e presidentit Vladimir Putin kundër Ukrainës.

Javën e kaluar, udhëheqësi i Koresë së Veriut u zotua për t’i “mbështetur pa kushte” të gjitha politikat dhe vendimet e presidentit rus.