Vrasja e shqiptarit nga bashkatdhetari në Itali, detaje të reja – Si nisi sherri mes të rinjve që përfundoi në tragjedi

Lajme

Gazeta Express

17/02/2026 11:57

Mediat italiane kanë publikuar detaje të tjera në lidhje me vrasjen e 25-vjeçarit Kevin Muharremi nga bashkatdhetari Renato Xyke, 20-vjeç, pak ditë më parë në Itali.

Sipas hetimeve paraprake, debati mes të rinjve dyshohet se ka nisur për shkak të një dëmtimi të lehtë në një makinë, që u përshkallëzua me përdorimin e armës së zjarrit disa orë më vonë.

Kevin Muharremi u godit nga tre plumba teksa ndodhej në sediljen e pasagjerit. I dyshuari Renato Xyke, po ashtu me origjinë shqiptare, dyshohet se ka qëlluar disa herë drejt automjetit nga një Range Rover Evoque gri i errët.

Autoritetet po analizojnë dëshmitë, pamjet e kamerave të sigurisë dhe telefonat celularë të personave të përfshirë për të zbardhur motivin dhe dinamikën e ngjarjes.

Pas të shtënave, i dyshuari dyshohet se u largua nga vendi i ngjarjes, la armën në Montecalvoli dhe u nis drejt Romës me familjen e tij.

Hetimet vijojnë për të sqaruar rolin e personave të tjerë të pranishëm dhe për të përcaktuar nëse takimi në Montecalvoli ishte i rastësishëm apo i organizuar për të zgjidhur konfliktin.