KOD: Vulë e një kompanie nga Shkupi është gjetur në depon me 5 ton kanabis në Serbi, në listën e dërgesave ishte përfshirë edhe Maqedonia e Veriut

Maqedoni

Gazeta Express

17/02/2026 9:15

Sipas informacioneve të KOD gjatë bastisjeve në fshatin Konjuh pranë Krushevcit, u gjetën edhe dy gjëra që e kthyen menjëherë vëmendjen e Serbisë kah fqinji i saj jugor, Maqedonia. Hetimi ka zgjatur për një kohë të gjatë, janë monitoruar aktivitetet e të njëjtit grup, i cili tani është i dyshuar. Por, këtë nuk e kanë bërë vetëm organet hetimore serbe, por siç mëson KOD, edhe ato maqedonase, kështu që ka pasur një shkëmbim njohurish dhe informacionesh. Sipas njohurive të KOD, në hetim ka qenë i përfshirë edhe EUROPOL, ndërsa për shkak të sasisë së madhe të marihuanës së gjetur interes tregoi edhe DEA, pavarësisht faktit se ajo merret me gjurmimin e kokainës dhe llojeve të tjera më të forta të drogës, raporton Telma, përcjell Portalb.mk.

Burimet tona thonë se prokuroria serbe, e njohur me shkurtesën TOK, ka pasur dijeni për marrëveshje të tilla dhe për këtë arsye i ka vendosur ato nën masa të posaçme hetimore si monitorim dhe përgjim edhe disa nga personat që dyshoheshin për importim të paligjshëm të të ashtuquajturit kanabis mjekësor, ose marihuanë. Gjithashtu janë monitoruar edhe lëvizjet e të dyshuarve të njëjtë sipas stacioneve bazë, ndërsa e gjithë kjo tani do të jetë edhe objekt krahasimi për lëvizjet në Maqedoni dhe daljen e kamionëve nga Maqedonia.

Por, në fund të janarit, për shkak të lëkundjeve të mëdha në polici dhe prokurori të cilat bëhen nga autoritetet atjeshme – papritmas prokuroria serbe për krim të organizuar – TOK kreu një operacion dhe bastisje nate në një pronë në fshatin Konjuh. Pa i njoftuar partnerët me të cilët kishin bashkëpunuar deri më atëherë. Disa bashkëbisedues të KOD janë të mendimit se aksioni në Serbi ishte i përshpejtuar për shkak të rrethanave politike tek fqinji jonë verior.

Pas përfundimit të operacionit, edhe pse prokurorët serbë prisnin të gjenin marihuanë, nuk prisnin të gjenin një sasi të madhe prej 5 tonësh. Edhe ata vetë janë habitur.

Por, gjatë kontrolleve u gjetën edhe dy gjëra që e lidhnin marihuanën me Maqedoninë. Është gjetur një vulë, një vulë origjinale e kompanisë nga Shkupi Alfapharm Group, selia dhe plantacionet e kanabisit të së cilës janë në rrethin e ish fabrikës OHIS. Kontrollet treguan se njëri nga të arrestuarit, Ivan Dragniq, është pronar i Alfapharm Group. Gjëja e dytë shumë e rëndësishme është se është gjetur një tefter me të dhëna për dërgesat e marihuanës, ku kanë qenë të shkruara me dorë dhe të regjistruara sasitë e dërgesave të caktuara, si dhe destinacioni nga vjen droga – dhe ka qenë e shënuar edhe Maqedonia.

Misteri më i madh nuk është zgjidhur – si dhe nëse marihuana vërtet ka mbërritur nga Maqedonia përmes një kalimi kufitar. Në Tabanoc është vendkalimi më i madh drejt Serbisë, ka një sistem one stop dhe nëpër këtë kalim çdo ditë mesatarisht kalojnë të paktën 500 kamionë. Ose për periudhën e dhënë nga zyra e prokurorit serb prej 29 ditësh, nëpër atë kalim do të kishin kaluar rreth 15 mijë kamionë. Meqenëse nuk ka të dhëna të tjera po kryhet një kontroll intensiv i dokumenteve dhe deklaratave. Nga dogana u përgjigjën shkurt se është duke u zhvilluar një hetim dhe nuk mund të ndajnë informacione nga ai me publikun, por se po e informojnë prokurorinë dhe policinë.

Bëhet fjalë për një procedurë të ngadaltë sepse kontrollohen deklaratat për qindra e qindra kamionë, ndërsa treguesi i vetëm është pesha e ngarkesës. Marihuana është e lehtë dhe zë shumë hapësirë ​​në një kamion, kështu që sipas llogaritjeve të KOD të publikuara në emisionin e kaluar, 5 ton do të duhej të transportoheshin me të paktën tre nga rimorkiot më të mëdha ose nëse transporti do të bëhej me kamionë më të vegjël, do të duhej të kishte 5, 6 ose 7 transporte për të arritur një peshë të përgjithshme prej 5 tonësh.

Gjatë eksportimit ose tranzitimit dogana i ndan kamionët në tre korsi, jeshile e cila përfshin pothuajse 96% të kamionëve në dalje kur kontrollohen vetëm deklaratat dhe dokumentet e tyre për mallrat që dalin nga Maqedonia. Rreth 6 përqind e kamionëve rreshtohen në korsinë portokalli kur kryhet edhe një kontroll i brendshëm i ngarkesës së paketuar në kamion.

Rreth 0,17% e kamionëve në pikat kufitare në Maqedoni hyjnë në korsinë e kuqe, pra në një kanal të veçantë kur eksportojnë mallra. Ose nga rreth 15 mijë kamionë në Tabanoc në periudhën e kontestuar të përmendur nga prokuroria serbe, në detaje janë kontrolluar  midis 25 dhe 30 kamionë. Gjatë importimit të mallrave në Maqedoni përqindja e kontrolleve të detajuara është shumë më e lartë sepse mallrat mbeten në vend.

Lulja e marihuanës klasifikohet sipas kodit tarifor për të gjitha lulet dhe farat, pra sipas tarifës doganore 1211 90 8610. Në Serbi nuk ka eksporte të tilla sepse kultivimi i kanabisit mjekësor nuk është i legalizuar atje dhe çdo ngarkesë, madje edhe tranziti, mund të sekuestrohet.

KOD zbulon se ka informacione fillestare për të paktën një transport të dyshimtë që ka qenë në gjysmën e parë të janarit. Ai mbante një ngarkesë të lehtë dhe ishte nisur nga brendësia e vendit me pajisje shtëpiake të lehta tekstili-pambuku dhe me destinacion përfundimtar – një vend në Evropën Perëndimore. Përveç kësaj, policia serbe ka informacione se i njëjti kamion është i lidhur me një denoncim për një rimorkio kamioni të shkatërruar dhe të djegur në Serbi. Informacionet po verifikohen.

Në Serbi prokuroria tashmë po heton dhe po kontrollon stacionet bazë dhe regjistrimet e pikëpagesave rrugore për të gjetur më shumë detaje rreth transportit. Ka pasur edhe një problem me numrin e regjistrimit, i cili gjithashtu është përfshirë në hetim.

Një ekip hetimor nga Maqedonia, një prokuror dhe anëtarë të Byrosë së Sigurisë Publike në fillim të kësaj jave i kanë vizituar homologët e tyre serbë për të mësuar më shumë dhe për të shkëmbyer informacione. Gjithashtu ka marrëveshje që shumë shpejt të krijohet një ekip i përbashkët dhe të nënshkruhet një dokument në mënyrë që të dy hetimet të mund të shkëmbejnë zyrtarisht informacione dhe prova me njëri-tjetrin.

Sipas informacioneve të KOD, prokuroria e Maqedonisë deri më tani ka marrë deklarata nga disa persona që kanë qenë të lidhur kryesisht me kompaninë Alfapharm Group, por edhe nga persona të tjerë që në një farë mënyre kanë qenë të lidhur me rastin. Për shembull, në Alfapharm ka pasur një problem me kamerat, në shumë vende ku duhej të ishin, nuk ka pasur fare, kështu që po kontrollojnë edhe sa regjistrime ka për të përcaktuar detajet e funksionimit të kësaj kompanie të Shkupit me pronarë serbë, njëri prej të cilëve është në paraburgim në Serbi.

Vetëm disa regjistrime janë bërë publike dhe këto janë nga vendi sekret në një objekt të Ministrisë së Punëve të Brendshme ku mbahet sasia e sekuestruar prej rreth 40 tonësh marihuanë, nga të cilat 9 janë nga Grupi ALfapharm me seli në Shkup.

Regjistrimet nga dy sekuestrimet, ai serb në Krushevc dhe ai në Maqedoni , tregojnë se kutitë në të cilat ka qenë e paketuar lulja e marihuanës janë të njëjta, dhe madje sipas informacioneve të KOD, ato kanë pasur të njëjtën peshë të kanabisit të paketuar. Por kjo lidhje nuk është e mjaftueshme dhe nuk është provë, kështu që tani nëpërmjet ekspertizës dhe analizës do të konstatohet përbërja e marihuanës dhe nëse është rritur jashtë, nëse është spërkatur apo në kushte laboratorike kur ka përbërës të tjerë në përbërje, sepse mbrohet në një mënyrë tjetër në një fabrikë të ligjshme.

Ekspertët e kësaj tematike për KOD shpjegojnë se duhet të konstatohet nëse ka mostra të gurit blu në marihuanë, gjë që mund ta lidhë origjinën e kanabisit me fushat dhe me shumë mundësi me Shqipërinë, dhe ta përjashtojë Maqedoninë si vendin e origjinës së kanabisit të sekuestruar. Në plantacionet ilegale në Shqipëri spërkatja me gur blu është një praktikë e zakonshme për të mbrojtur bimët e marihuanës. Me rëndësi kyçe për analizën dhe vërtetimin se marihuana nga Maqedonia dhe ajo serbe janë të njëjta do të jetë përbërja, pra përqindja e THC-së në pakot e sekuestruara të kanabisit.

Nga ana tjetër në Maqedoni janë konstatuar parregullsi serioze në grupin Alfapharm, në ruajtjen, etiketimin, sigurinë dhe video mbikëqyrjen. Dyshimet janë se në këtë mënyrë marihuana mjekësore e ligjshme u bë marihuanë e paligjshme për kontrabandë, e cila është 4 deri në 5 herë më e shtrenjtë se kanabisi i shitur ligjërisht për vajra farmaceutikë dhe terapi me kanabis. Një gram marihuanë në rrugë, çmimi nëMaqedoni është 500 denarë, ndërsa një gram lule për shitje mjekësore të ligjshme shitet për një euro e gjysmë, e në rastet më të mira deri në 2 euro për gram. Hetimi në Maqedoni tani po ndjek rrugën e vështirë – si t’i shndërrojë dyshimet në prova për krimet më të rënda, përndryshe sekuestrimi do të mbetet vetëm një shkelje e rregullave të rrepta për kultivimin e marihuanës mjekësore.

Ndryshe, së fundmi u zhvillua aksioni i madh i Prokurorisë Themelore Publike për Ndjekjen e Krimit të Organizuar dhe Korrupsionit (PTHP NKOK) dhe Ministrisë së Punëve të Brendshme (MPB) në Maqedoninë e Veriut për sekuestrimin e mbi 40 ton marihuanë nga disa persona juridikë në vend. Aksioni filloi pas sekuestrimit të 5 ton marihuanë në Serbinë fqinje, të cilën mediat lokale raportuan se kishte origjinë nga Maqedonia.

Ministria e Punëve të Brendshme më 7 shkurt, informoi se është duke u zhvilluar një aksion në shkallë të gjerë, në kuadër të të cilit është sekuestruar një sasi e madhe marihuane.