Google vendos një afat të ri për përdoruesit e Fitbit që rrezikojnë humbjen e të dhënave

AutoTech

Gazeta Express

02/02/2026 22:08

Një ndryshim i paralajmëruar prej kohësh ka një datë të re për këtë vit.

Fitbit u ble nga Google në 2021, por nëse keni pasur një Fitbit para kësaj date, mund të jeni ende duke përdorur pajisjen tuaj dhe aplikacionin Fitbit për iPhone ose Android, të kyçur me një llogari Fitbit.

Që nga viti 2023, Google kërkon që përdoruesit e rinj të Fitbit të regjistrohen në shërbim duke përdorur llogarinë e tyre Google, duke eliminuar sistemin e vjetër të llogarive Fitbit.

Google ka paralajmëruar përdoruesit e Fitbit që janë ende të kyçur me llogaritë e vjetra se do të duhet të migrojnë të dhënat e tyre në një llogari aktive Google, përndryshe do të humbasin historikun e tyre të të dhënave. Për disa përdorues, kjo mund të përfshijë më shumë se një dekadë të dhënash për shëndetin dhe aktivitetin fizik.

Afati i mëparshëm për këtë migrim ishte 2 shkurt 2026, por siç raportoi 9to5Google, afati është shtyrë tani në 19 maj 2026, duke dhënë përdoruesve më shumë kohë për të bërë kalimin.

“Pas 19 majit 2026, nuk do të mund të hyni më në Fitbit me llogarinë tuaj Fitbit,” tha Google në një faqe të përditësuar mbështetëse. “Për të vazhduar përdorimin e llogarisë suaj, do t’ju duhet të transferoni llogarinë Fitbit tek Google.”

“Ju mund të shkarkoni ose fshini të dhënat tuaja në çdo moment para se të fillojmë përpunimin e fshirjes së të dhënave më 15 korrik 2026.”

Kjo ju jep mundësinë të shkarkoni të dhënat tuaja në format të papërpunuar për t’i shfletuar në PC, ose t’i fshini tërësisht, në mënyrë që Google të mos i ruajë më në serverat e saj.

Fitbit tani është një shërbim i Google, po aq sa Gmail, Google Drive apo YouTube, kështu që kompania dëshiron që përdoruesit të transferojnë të dhënat e tyre në llogarinë Google për të mos i humbur ato. Google nuk ka dhënë arsye pse ka shtyrë afatin – në fakt, edhe afati i mëparshëm i shkurtit ishte shtyrë më herët.

Shumë gjasa, përdoruesit që nuk e kanë bërë migrimin janë fansa të vjetër të platformës Fitbit, dhe Google nuk dëshiron t’i shqetësojë duke fshirë automatikisht të dhënat e tyre.

Megjithatë, realiteti është se të dhënat tuaja të Fitbit u transferuan tek Google në ditën kur u përfundua bashkimi në 2021. Vetëm sepse jeni të kyçur me një llogari Fitbit dhe jo Google, nuk do të thotë që të dhënat tuaja personale nuk janë më në duart e Google.

Nëse humbisni afatin e ri ose nuk dëshironi të transferoni të dhënat e vjetra, ato do të fshihen nga 15 korriku 2026. Pas kësaj date, mund të përdorni pajisjen Fitbit ose aplikacionin vetëm duke u kyçur me një llogari Google – por të dhënat tuaja nuk do të jenë më në dispozicion nëse nuk i migroni para 16 majit. /GazetaExpress/