Kujdesi i shpeshtë për nipërit dhe mbesat mund të rrisë rrezikun e depresionit, tregon një sudim

Keshilla Mjekësore

Gazeta Express

26/01/2026 19:17

Sado të dashur dhe të çmuar të jenë nipërit e mbesat, kujdesi i rregullt për ta mund të ketë pasoja negative për shëndetin mendor të gjyshërve, sugjeron një studim i ri.

Hulumtimi tregon se ky angazhim rrit ndjeshëm rrezikun e depresionit, veçanërisht te gjyshërit më të moshuar që kujdesen për fëmijë të vegjël e kërkues nën moshën gjashtë vjeç.

Sipas studiuesve, arsyeja kryesore lidhet me lodhjen fizike dhe barrën financiare që sjell kujdesi për foshnjat dhe fëmijët e vegjël, sidomos gjatë kohës kur prindërit janë në punë.

Sipas organizatës bamirëse Age UK, rreth pesë milionë gjyshër marrin rregullisht përgjegjësi për kujdesin ndaj nipërve dhe mbesave. Gati 90 për qind e tyre bëjnë babysitting të paktën një herë në javë.

Në një rast nga dhjetë, gjyshërit kujdesen për nipërit çdo ditë – në disa raste për një periudhë pesëvjeçare ose edhe më gjatë.

Shumica e gjyshërve angazhohen për të ndihmuar fëmijët e tyre të rrisin të ardhurat dhe të mbështesin familjen e re.

Age UK thekson se i ashtuquajturi “gjysh-nanitje” ka përfitime të mëdha për çiftet e moshuara, duke i mbajtur ata aktivë mendërisht dhe fizikisht dhe duke reduktuar ndjenjën e vetmisë.

Megjithatë, studimi më i fundit, i kryer nga një ekip psikologësh në Universitetin e Shkencave Mjekësore Shahid Beheshti në Teheran, sugjeron se jo të gjithë gjyshërit i përjetojnë këto përfitime.

Studiuesit intervistuan mbi 400 çifte të moshuara, duke i pyetur sa shpesh kujdeseshin për nipërit dhe nëse përjetonin probleme me humorin e ulët ose shenja depresioni.

Rezultatet, të publikuara në revistën shkencore BMC Psychology, nuk gjetën lidhje mes kujdesit për nipërit dhe depresionit te gjyshërit më të rinj, në të pesëdhjetat.

Por te gjyshërit në të gjashtëdhjetat, u vu re një rritje e ndjeshme e rrezikut për depresion – veçanërisht kur nipërit ishin nën moshën gjashtë vjeç.

Sipas studiuesve, për këta persona kujdesi për nipërit mund të sjellë presion më të madh emocional dhe fizik, duke u marrë shumë kohë dhe energji. Po ashtu, ky rol mund të përkeqësojë vështirësitë financiare, pasi shumë të moshuar përballen me të ardhura të ulëta pas daljes në pension.

Këta faktorë, sipas tyre, mund të përkeqësojnë ose nxisin zhvillimin e depresionit.

Gjetjet përforcojnë edhe studime të mëparshme që sugjerojnë se kujdesi i shpeshtë për nipërit mund të shkaktojë tensione në marrëdhëniet martesore të gjyshërve.

Një studim i vitit 2020 nga Universiteti i Massachusetts Boston zbuloi se një nga arsyet kryesore ishte ndarja e pabarabartë e përgjegjësive: gjyshet shpesh mbartin pjesën më të madhe të punëve të lodhshme, si ushqimi dhe larja e fëmijëve të vegjël, ndërsa gjyshërit përqendrohen më shumë në aktivitetet argëtuese dhe lojën. /GazetaExpress/