Kandidati i PDK’së për deputet, Qëndrim Kryeziu: E papranueshme se si pushteti po e përdor RTK’në, fushatë mashtrimi

Zgjedhjet

Gazeta Express

27/12/2025 18:13

Qëndrim Kryeziu, kandidat i Partisë Demokratike të Kosovës për deputet, ka thënë se pushteti ‘’në ike po e përdor RTK’në’’, duke e vlerësuar këtë gjë si të papranueshme.

Ai ka thënë edhe se, intervista e paralajmëruar e Albin Kurtit për sonte, ‘’ nuk është informim për qytetarët, por vazhdim i një fushate mashtrimi dhe propagande, e ndërtuar mbi kapjen e institucioneve që duhet të jenë të pavarura’’.

Postimi:

Si kandidat i PDK-së për zgjedhjet e 28 dhjetorit, e konsideroj të papranueshme mënyrën se si pushteti në ikje po e përdor RTK-në në ditët vendimtare të fushatës. Televizioni publik nuk është pronë e qeverisë dhe as megafon i Albin Kurtit.

Intervista e paralajmëruar sonte nuk është informim për qytetarët, por vazhdim i një fushate mashtrimi dhe propagande, e ndërtuar mbi kapjen e institucioneve që duhet të jenë të pavarura. Në ditën e fundit të fushatës, RTK duhej të ishte platformë e barabartë për të gjithë subjektet politike, jo strehë e privilegjuar për kryeministrin në ikje.

Kjo sjellje tregon frikë nga përballja, frikë nga debati dhe mungesë respekti për demokracinë. Qytetarët meritojnë zgjedhje të ndershme, informim të paanshëm dhe institucione që u shërbejnë atyre, jo pushtetit.

Më 28 dhjetor, qytetarët kanë mundësinë ta ndalin këtë kapje dhe ta kthejnë shtetin në binarë normalë. PDK është alternativa e përgjegjshme dhe serioze për Kosovën.