“It Was Just an Accident”, sonte në Kino Armata

Arte

Gazeta Express

17/12/2025 15:05

“It Was Just an Accident” (2025 i regjisorit iranian Jafar Panah do të shfaqet më 17 dhjetor, nga ora 19:00 në Kino Armata.

“It Was Just an Accident” është një ndër pesë filmat e nominuar për Çmimin LUX të Audiencës (Lux Audience Award), i cili është çmimi më i madh i filmit të zgjedhur nga audienca në Evropë, ku qytetarët zgjedhin fituesin së bashku me Anëtarët e Parlamentit Evropian. Si publiku ashtu edhe eurodeputetët mund t’i vlerësojnë filmat online. Filmi me totalin më të lartë të pikëve – ku vota e publikut dhe ajo e eurodeputetëve kanë peshë të barabartë prej 50% secila – do të fitojë Çmimin LUX të Audiencës. Fituesi do të shpallet në Ceremoninë e Çmimit LUX, e cila do të mbahet në Parlamentin Evropian në Bruksel më 14 prill 2026.

LUX Audience Award jepet çdo vit nga Parlamenti Europian dhe Akademia Evropiane e Filmit, në partneritet me Komisionin Evropian dhe Europa Cinemas.

Filmi ‘It Was Just an Accident’ (në frëngjisht Un Simple Accident) është film dramatik-thriller iraniano-francez-luksemburghez shkruar dhe i regjizuar nga Jafar Panahi.

Përshkrim i shkurtër:

Vahidi, një mekanik makinash nga Azerbajxhani, dikur ishte burgosur nga autoritetet iraniane. Gjatë dënimit të tij, ai u mor në pyetje me sy të lidhur. Një ditë, një burrë i quajtur Eqbal hyn në punishte. Këmba e tij protetike kërcet dhe Vahidi mendon se njeh një nga ish-torturuesit e tij.

Tema kryesore trajton hakmarrjen, drejtësinë, mëshirën dhe pasojat e dhunës shtetërore — e gjithë kjo përzier me momente të tjera më të errëta apo edhe humor të hollë.

Rreth regjisorit:

Jafar Panahi është një nga regjisorët më të njohur iranianë bashkëkohorë me një karrierë të gjatë dhe të respektuar ndërkombëtarisht. Panahi ka qenë i burgosur disa herë në Iran për filmat e tij kritikë ndaj regjimit dhe për pretendime të “propagandës kundër shtetit”. Ai u ndalua nga qeveria iraniane për të bërë filma dhe për të udhëtuar jashtë vendit, por shpesh i realizoi filmat në mënyrë të fshehtë dhe i dërgoi për t’u shfaqur në festivale ndërkombëtare. Ai njihet për filma që kombinojnë realizëm social, satirë të hollë dhe reflektime mbi lirinë dhe represionin. Filmat e tij shpesh eksplorojnë tema të kushteve shoqërore, të drejtave civile dhe jetës njerëzore nën shtypje.