Alarm për “trashësinë e belit”: Meshkujt me bark të madh rrezikojnë një sëmundje vdekjeprurëse

Keshilla Mjekësore

Gazeta Express

05/12/2025 19:36

Një studim i ri ka zbuluar se meshkujt me “bark birre” janë në rrezik më të lartë për të zhvilluar një sëmundje serioze të zemrës. Hulumtimi tregon një lidhje të fortë mes sëmundjeve kardiake dhe dhjamit abdominal.

Gjetjet, që do të prezantohen këtë javë në takimin vjetor të Radiological Society of North America (RSNA), tregojnë se dhjami rreth barkut lidhet me ndryshime më të dëmshme në strukturën e zemrës sesa pesha e përgjithshme trupore. Rreziku ishte veçanërisht më i madh te meshkujt.

Autorja kryesore e studimit, Jennifer Erley nga University Medical Centre Hamburg-Eppendorf në Gjermani, deklaroi:

“Obeziteti abdominal – një raport i lartë bel-kofshë – shoqërohet me modele më shqetësuese të rindërtimit të zemrës sesa një indeks i lartë i masës trupore (BMI). Kjo duket se çon në një formë potencialisht patologjike të rimodelimit të zemrës, të quajtur hipertrofi koncentrike, ku muskujt e zemrës trashet por madhësia e përgjithshme e zemrës nuk rritet. Si rezultat, dhomat e brendshme zvogëlohen dhe zemra mban e pompon më pak gjak. Ky model e vështirëson relaksimin e zemrës dhe mund të çojë në insuficiencë kardiake.”

Në kuadër të studimit, shkencëtarët analizuan imazhe të rezonancës magnetike kardiovaskulare të 2,244 të rriturve të moshës 46 deri në 78 vjeç, të cilët nuk kishin histori të sëmundjeve të zemrës.

Sipas matjeve të BMI-së, 69% e meshkujve dhe 56% e femrave u kategorizuan si mbipeshë ose obezë. Por sipas raportit bel-kofshë (WHR), 91% e meshkujve dhe 64% e femrave plotësonin kriteret e OBSH-së për obezitet abdominal.

Siç raporton Study Finds, obeziteti i përgjithshëm (bazuar në BMI) ishte më shpesh i lidhur me zmadhimin e dhomave të zemrës. Ndërsa obeziteti abdominal ishte i lidhur me trashje të muskulit të zemrës dhe dhoma më të vogla të saj.

Këto ndryshime ishin edhe më të theksuara te meshkujt, sidomos në barkushen e djathtë – e cila pompon gjakun drejt mushkërive. Studiuesit besojnë se kjo mund të tregojë shenja të hershme stresi kardiak të shkaktuar nga mënyra se si dhjami abdominal ndikon në frymëmarrje dhe presionin e mushkërive.

Përveç kësaj, obeziteti u shoqërua me ndryshime të imëta në inde të zemrës te meshkujt, të dukshme vetëm përmes MRI-ve të avancuara. Këto lidhje mbetën të forta edhe pasi u morën parasysh faktorë të tjerë rreziku, si tensioni i lartë, duhanpirja, diabeti dhe kolesteroli.

Dr. Erley shtoi:

“Dallimet mes gjinive sugjerojnë se meshkujt mund të jenë më të ndjeshëm ndaj efekteve strukturore të obezitetit në zemër – një gjetje që nuk është raportuar gjerësisht më parë. Në vend që të fokusohemi vetëm te humbja e peshës, të rriturit në moshë të mesme duhet të synojnë parandalimin e akumulimit të dhjamit abdominal përmes ushtrimeve të rregullta, ushqimit të balancuar dhe, kur është e nevojshme, ndërhyrjes mjekësore.”

Ajo shtoi se nevojiten kërkime të mëtejshme në këtë fushë.

Si ta kontrolloni raportin bel-kofshë?

Çdokush mund ta llogarisë WHR në shtëpi:

Matni perimetrin e belit në pikën më të ngushtë.

Matni perimetrin e kofshëve në pikën më të gjerë.

Ndani perimetrin e belit me atë të kofshëve.

Sipas OBSH-së:

Një raport mbi 0.90 për meshkujt

dhe 0.85 për femrat

tregon obezitet abdominal dhe rrezik të shtuar për sëmundje të zemrës. /GazetaExpress/