Çfarë tregojnë simptomat më të zakonshme të dimrit për shëndetin tuaj, sipas një terapiste të njohur ushqimore

Keshilla Mjekësore

Gazeta Express

04/12/2025 20:35

Ndërsa futemi më thellë në muajt e ftohtë të dimrit – dhe në një periudhë të ngarkuar me festa e aktivitete – shumë prej nesh ndihen më të lodhur se zakonisht.

Qoftë kolla e lehtë, lodhja e vazhdueshme, lëkura e zbehtë apo mungesa e energjisë, shpesh ia vëmë fajin motit të keq, stresit të festave dhe mikrobeve që qarkullojnë në ambiente të mbyllura. Por kur këto simptoma të zakonshme dimri mund të jenë shenjë e një problemi më të thellë – konkretisht, mungesës së një vitamine apo lënde ushqyese që trupi ka nevojë për të funksionuar siç duhet?

Sipas Erin Viljoen, terapiste ushqimore në W-Wellness, shumë nga shqetësimet e zakonshme të dimrit janë sinjal se sistemi imunitar ka nevojë për ndihmë. Ajo ka identifikuar gjashtë simptomat më të zakonshme që dëgjon nga pacientët – dhe çfarë tregojnë ato për nivelin e lëndëve ushqyese në organizëm. Më poshtë është një përmbledhje praktike që tregon se çfarë mund të fshihet pas këtyre “bezdisjeve” festive.

Lodhja e vazhdueshme dhe mungesa e energjisë

Të gjithë e njohim ndjesinë e lodhjes festive: Net pa gjumë, vallëzime dhe – ta pranojmë – pak më shumë kokteje se zakonisht. Por nëse lodhja nuk largohet edhe pas disa netëve të qeta, mund të tregojë mungesë të vitaminës D, hekurit, vitaminës B12 ose acidit folik.

Sipas Viljoen, këto lëndë ushqyese janë thelbësore për prodhimin e energjisë, dhe mungesa e tyre e vështirëson funksionimin normal të trupit.

Vitamina D, që e marrim më pak gjatë dimrit për shkak të mungesës së dritës së diellit, ndikon drejtpërdrejt në energji dhe sistemin imunitar.

Hekuri është i domosdoshëm për oksigjenimin e muskujve dhe indeve – pa të, trupi ndihet i rënduar e i plogësht.

Vitamina B12 dhe acidi folik janë të rëndësishme për prodhimin e qelizave të kuqe të gjakut, dhe mungesa e tyre çon në lodhje të fortë.

Të gjitha këto mungesa mund të zbulohen me analizë gjaku. Nëse ndiheni të rraskapitur për një kohë të gjatë, është mirë të kontrolloni nivelet tuaja.

Ndryshime humori apo humor i ulët

Edhe hangover-i ndikon, por nëse vëreni humor të ulët të vazhdueshëm, mund të jetë shenjë e mungesës së vitaminës D, omega-3 ose vitaminave të grupit B – të gjitha thelbësore për funksionin e trurit dhe qartësinë mendore.

Vitamina D ndihmon në prodhimin e serotoninës, hormoni i mirëqenies.

Omega-3, të cilat gjenden te peshku dhe farat e linit, përmirësojnë funksionet e trurit dhe reduktojnë simptomat e depresionit.

Vitaminat B6, B12 dhe acidi folik ulin stresin, ankthin dhe ndihmojnë stabilitetin emocional.

Nëse fryma juaj nuk ngrihet dot, pavarësisht pushimit, shikoni më nga afër dietën tuaj – një suplement i vogël mund të bëjë diferencë të madhe gjatë dimrit.

Infeksione të shpeshta dhe shërim i ngadalshëm

Gjithkush sëmuret më shpesh në dimër, por nëse ju bie imuniteti shpesh dhe ju duhet shumë kohë për t’u rikuperuar, mund të jeni në mungesë të vitaminës D, zinkut ose hekurit.

Vitamina D rregullon funksionin imunitar.

Zinku është antioksidant i fuqishëm që lufton bakteret dhe viruset.

Hekuri ndihmon prodhimin e qelizave të shëndetshme të gjakut dhe transportimin e oksigjenit.

Dhimbje muskujsh, dobësi ose dhimbje kyçesh

Nëse zgjoheni çdo mëngjes sikur keni bërë ushtrime të rënda – edhe kur s’keni lëvizur shumë – fajin mund ta kenë mungesa e vitaminës D ose magnezit.

Vitamina D ndihmon në përthithjen e kalciumit, i domosdoshëm për kocka të forta.

Magnezi mbështet relaksimin e muskujve dhe funksionimin e tyre normal.

Mungesa e tyre shkakton ngërçe, ngurtësi dhe dhimbje.

Lëkurë e thatë ose thonj/flokë të brishtë

Në dimër lëkura thahet natyrshëm, por nëse tek ju shfaqet thatësi e tepruar apo thonj të dobët, shkaku mund të jetë mungesa e vitaminës D, zinkut ose omega-3.

Këto lëndë ushqyese ndihmojnë:

rigjenerimin e lëkurës,

hidratimin e saj,

elasticitetin dhe shërimin e plagëve.

Duart dhe këmbët e ftohta

Nëse edhe brenda në ambient të ngrohtë keni duar e këmbë të akullta, mund të jetë tregues i mungesës së hekurit, jodit ose selenit, të cilat ndikojnë në qarkullimin e gjakut dhe temperaturën e trupit.

Hekuri ndihmon në prodhimin e qelizave të kuqe që transportojnë oksigjenin.

Jodi dhe seleni ndikojnë në funksionin e tiroides dhe metabolizmin – çrregullimet e tyre shpesh sjellin ndjesi të ftohti. /GazetaExpress/