Mjeku familjar shpjegon si të pastroni veshët në mënyrë të sigurt

Keshilla Mjekësore

Gazeta Express

26/11/2025 18:51

Pastrimi i veshëve me bastonë pambuku, diçka që shumë prej nesh e bëjmë pa e menduar, mund të sjellë më shumë dëme sesa përfitime, paralajmëron një mjek i njohur britanik.

Dr. Suraj Kukadia, 33 vjeç, mjek i NHS në Hertfordshire — i njohur si Dr. Sooj në rrjetet sociale — thotë se ka “dëgjuar dhe parë shumë histori horror” nga pacientë që kanë përdorur bastona pambuku për të hequr dyllin nga veshi, pavarësisht paralajmërimeve të vazhdueshme të ekspertëve.

Në një video të publikuar në TikTok për afro 300 mijë ndjekësit e tij, ai shpjegon:

“Kam trajtuar shumë pacientë që kanë përdorur bastona pambuku për të ‘pastruar’ veshët, por pa e ditur e kanë shtyrë dyllin drejt daulles së veshit. Kjo ka shkaktuar rënie të dëgjimit, marramendje dhe tinnitus.”

Sipas tij, bastonat e pambukut, Q-tipset, qirinjtë e veshit apo instrumentet metalike nuk e zgjidhin problemin — përkundrazi e përkeqësojnë atë duke shtyrë dyllin më thellë ose duke dëmtuar kanalin e veshit.

Çfarë është tinnitusi?

Tinnitusi është perceptimi i zhurmave në vesh — si fishkëllimë, zile, gumëzhimë ose zhurmë elektrike — pa një burim të jashtëm. Ai lidhet me dëmtimin e qelizave të brishta të dëgjimit në veshin e brendshëm. Me kohë, dëmtimi mund të çojë në humbje të përhershme të dëgjimit.

Sipas Royal National Institute for Deaf People (RNID), rreth 1 në 7 të rritur në Britani vuajnë nga tinnitus, dhe trajtimet kryesore fokusohen në menaxhimin e simptomave, jo shërimin.

Por tinnitus nuk është rreziku i vetëm. Dr. Sooj tregon raste të infeksioneve të rënda, madje edhe pacientë që përkohësisht kanë humbur dëgjimin pasi kanë shpuar daullen e veshit gjatë pastrimit.

“Kam parë njerëz që, pas përdorimit të bastonave, kanë zhvilluar otitis externa — infeksion të kanalit të jashtëm të veshit — me dhimbje dhe rrjedhje sekrecionesh,” tha ai.

Si të pastroni veshët në mënyrë të sigurt?

Mjekët theksojnë se shmangia e bastonave të pambukut nuk do të thotë t‘i lini veshët “të ndotur”. Zakonisht veshi i pastron vetë.

Në shtëpi, Dr. Sooj rekomandon:

pika me vaj ulliri ose pika me sodë buke (vetëm kur ka dyll të tepërt)

2–3 pika, dy herë në ditë, deri në katër javë

dylli zbutet dhe del natyrshëm

Ai kujton se pikat duhet përdorur siç duhet — që të mos dalin menjëherë jashtë.

Sipas udhëzimeve të NHS:

lexoni udhëzimet e pikave

lani dhe thani duart

ngrohni shishen disa minuta në duar

shtrihuni anash me veshin përpjetë

tërhiqni butë llapën lart dhe larg qafës

vendosni sasinë e përshkruar të pikave

mbajeni kokën në atë pozicion për 5 minuta

fshini tepërtinë me një letër të pastër

Gjatë trajtimit, rekomandohet të mos notoni dhe të shmangni hyrjen e ujit në vesh.

Nëse bllokimi vazhdon, kërkohet ndihmë profesionale:

“Ne mund ta heqim dyllin me aspirim ose shpëlarje të butë — por ju lutem mos e provoni vetë,” paralajmëron Dr. Sooj. “Daullja e veshit është më e hollë se letra — një gabim i vogël mund të shkaktojë dhimbje, infeksion, dëmtim të përhershëm të dëgjimit.” /GazetaExpress/