Ekspertët paralajmërojnë: Një zakon i zakonshëm dimëror mund të shkaktojë rënie flokësh

Keshilla Mjekësore

Gazeta Express

26/11/2025 18:47

Një specialist i lëkurës dhe flokëve ka ngritur alarmin për rrezikun në rritje të infektimit me kërpudhën e kokës gjatë këtij dimri – një infeksion që mund të çojë deri në rënie të flokëve dhe zona të qeliosura.

Rastet me tinea capitis (kërpudha e lëkurës së kokës) u rritën ndjeshëm vitin e kaluar, dhe një pjesë e fajit iu atribua berberëve të pakualifikuar, kushteve të pasigurta higjienike dhe prerjeve të tipit skin fade.

Por ekspertët besojnë se këtë dimër infeksioni mund të përhapet edhe përmes ndarjes së aksesorëve, si kapelet e dimrit, kapelat e Babagjyshit ose veshjeve të tjera të përbashkëta.

Edhe pse shpesh lidhet me të kaluarën ose me kushtet e varfra të jetesës, ringworm është një infeksion i zakonshëm – që prek deri në 10–20% të popullsisë, kryesisht fëmijët. Ai transmetohet përmes kontaktit të drejtpërdrejtë me lëkurën, por edhe përmes objekteve të infektuara, si peshqirët, krehrat, jastëkët apo çarçafët.

Sam Cinkir, CEO i qendrave mjekësore Este Medical Group, thotë:

“Infeksioni shpesh përhapet kur njerëzit ndajnë peshqirë, krehra, furça flokësh, jastëkë dhe, sigurisht, kapelet. Zakonisht trajtohet me ilaçe antifungale ose shampoo të posaçme, por nëse lihet pa trajtim, mund të shkaktojë zona të dukshme pa flokë. Këshilla më e mirë është të mos ndani kapele me të tjerët.”

Ai shton se veprimi i shpejtë është kyç:

“Nëse dyshohet kërpudha e kokës, shmangni kruajtjen sepse infeksioni përhapet më tej. Lani menjëherë rrobat dhe shtratin që kanë qenë në kontakt me lëkurën e kokës dhe kontaktoni mjekun e familjes për diagnozë.”

Simptomat më të zakonshme përfshijnë:

kruajtje të kokës

zona të rrumbullakëta, me luspa

skuqje ose njolla të ngritura

rënie të flokëve në formë rrethi

Në disa raste, nevojitet trajtim me ilaçe orale antifungale, sidomos tek fëmijët.

Dr. James O’Donovan, mjek i NHS dhe anëtar këshillues i OBSH-së, thekson se kërpudhat mund të mbijetojnë për një kohë të gjatë në objekte, prandaj ndarja e kapelave, veçanërisht në shkolla apo ambiente publike, duhet shmangur. Nëse preket një fëmijë, mësuesit dhe prindërit e shokëve të klasës duhet të njoftohen, ndërsa pjesëtarët e tjerë të familjes shpesh këshillohet të kontrollohen dhe, në raste të caktuara, të trajtohen preventivisht.

Rritja e rasteve vitin e kaluar u vu re edhe nga berberë në Britani, të cilët fajësuan rritjen e popullaritetit të prerjeve skin fade dhe qendrat jo profesionale të rruajtjes, të cilat “kanë pushtuar rrugët kryesore” pa standarde higjiene.

Ekspertët rikujtojnë:

Shmangni ndarjen e kapelave dhe mjeteve të flokëve, mbani higjienë personale dhe kërkoni ndihmë mjekësore sapo të shfaqen simptomat. /GazetaExpress/