Ukraina kërkon takim Trump-Zelensky në SHBA këtë javë

Lajme

Gazeta Express

25/11/2025 19:23

Shefi i sigurisë së Ukrainës thotë se shpreson të organizojë një vizitë të Presidentit Volodymyr Zelensky në SHBA “në datën më të afërt të përshtatshme” këtë muaj, ndërsa përpjekjet diplomatike për t’i dhënë fund luftës vazhdojnë, ka raportuar BBC, transmton Gazeta Express.

Rustem Umerov, kreu i këshillit të sigurisë së Ukrainës, tha të martën se SHBA-të dhe Ukraina kishin arritur “një mirëkuptim të përbashkët mbi kushtet kryesore të marrëveshjes së diskutuar” në bisedimet e mëparshme në Gjenevë.

Shtëpia e Bardhë nuk ka komentuar mbi mundësinë e bisedimeve Trump-Zelensky.

Ndërkohë, Sekretari i Ushtrisë Amerikane, Dan Driscoll, është takuar me përfaqësues rusë në Abu Dhabi. Nuk dihet se kush është në delegacionin rus.

Umerov tha se ekipi i tij “pret me padurim” të organizojë vizitën e Zelensky në SHBA “në datën më të afërt të përshtatshme në nëntor për të përfunduar hapat përfundimtarë dhe për të arritur një marrëveshje” me Presidentin Amerikan Donald Trump.

Më parë, një zyrtar amerikan që udhëtonte me Driscoll në Abu Dhabi i informoi gazetarët se Ukraina kishte rënë dakord për marrëveshjen e paqes me detaje të vogla që duhen zgjidhur.

E pyetur për ta konfirmuar këtë, administrata i drejtoi BBC-së komentet e Sekretarit të Shtetit Marco Rubio në Gjenevë të dielën, kur ai tha se diskutimet e nivelit më të lartë do të ishin ende të nevojshme për të finalizuar marrëveshjen.

Hendeku midis kushteve që Ukraina dhe Rusia do të pranojnë është ende shumë i madh dhe Kremlini nuk ka gjasa të bjerë dakord me llojin e marrëveshjes që Kievi mund të miratojë.

Udhëheqësit në Kiev dhe Evropë kishin kritikuar draftin fillestar të një plani paqeje prej 28 pikash të SHBA-së që doli javën e kaluar, duke e quajtur atë shumë të favorshëm për Rusinë.

Kundërpropozimet – të cilat thuhet se janë hartuar nga Mbretëria e Bashkuar, Franca dhe Gjermania – përjashtuan çdo njohje të rajoneve të mbajtura nga Rusia, rritën madhësinë e lejuar të ushtrisë së Ukrainës dhe lanë derën hapur për anëtarësimin e Ukrainës në NATO.