Hapet lotari për parisienët për ta fituar mundësinë t’u varrosur në të njëjtën hapësirë me Jim Morrison e Oscar Wilde

Lajme

Gazeta Express

06/11/2025 11:22

Qyteti i Parisit ka hapur një lotari. Në vend të një çmimi në para, pjesëmarrësit mund të fitojnë mundësinë për t’u varrosur në një nga varrezat më të famshme të kryeqytetit francez, shkruan CNN.

Plani i pazakontë synon t’i rikthejë në gjendje të mirë varret që janë lënë në harresë, duke u dhënë njëkohësisht banorëve të Parisit një mundësi të rrallë për të siguruar një nga parcelat e kërkuara, tha komuna në një deklaratë të publikuar të premten.

Varrezat brenda mureve të qytetit kanë qenë pothuajse të mbushura që nga fillimi i shekullit XX, ndërsa pastrimi i varreve të braktisura është vështirësuar nga rregulloret vendore, shpjegoi autoriteti.

Por tani, fituesit e lotarisë do të kenë mundësinë ta blejnë dhe ta restaurojnë një nga 30 varret në tre varreza të ndryshme, me bashkinë që pranon t’u japë me qira parcelën përkatëse të varrimit atyre që plotësojnë standardet e caktuara.

“Gjatë dekadave të fundit, vizitorët e varrezave në mbarë Francën kanë shprehur interes për ta restauruar një monument funerar historik në mënyrë që ta marrin në këmbim një koncesion për parcelë varrimi”, tha komuna në deklaratë.

Megjithatë, dhënia e mundësisë për ta bërë këtë është ndërlikuar nga ligjet që rregullojnë çështjen e tokës mbi të cilën ndodhet një varr, e cila është në pronësi të shtetit, si dhe nga koncesionet, përmes të cilave një familje e merr parcelën me qira për një periudhë të caktuar kohore.

Tani, komuna shpreson se ka gjetur një zgjidhje, me 10 parcela të disponueshme në varrezat Père-Lachaise, ku prehen ndër të tjerë vokalisti i “The Doors” Jim Morrison, dramaturgu Oscar Wilde dhe këngëtarja Édith Piaf.

Gjithashtu, ka 10 parcela në varrezat Montparnasse, ku janë varrosur shkrimtarët Jean-Paul Sartre, Simone de Beauvoir dhe Susan Sontag, si dhe 10 të tjera në varrezat Montmartre, ku ndodhen piktori Edgar Degas, autori Émile Zola dhe balerini Vaslav Nijinsky.

Çdo varr ekzistues do të jetë i disponueshëm për t’u blerë për 4,000 euro), me fituesit që do t’i mbulojnë gjithashtu kostot e restaurimit.

Më pas, ata do të mund të blejnë një kontratë qiraje, çmimi i së cilës nis nga 976 euro për një periudhë 10-vjeçare dhe arrin deri në 17,668 euro për të drejtën e përjetshme për t’u prehur aty.

Aplikimet për lotarinë u hapën të hënën dhe do të mbyllen më 31 dhjetor, sipas komunës, me çdo pjesëmarrës që duhet ta paguajë një tarifë regjistrimi prej 125 eurosh.