Lufta kundër krimit të organizuar, BE: Kosova i ka zbatuar pjesërisht rekomandimet, mbesin valide edhe për vitin tjetër

Lajme

Gazeta Express

04/11/2025 17:59

 Raporti i Progresit i BE-së i publikuar sot ka konstatuar se Kosova është ndërmjet fazës së hershme të përgatitjes dhe një niveli të caktuar përgatitjeje në luftën kundër krimit të organizuar dhe ka bërë disa përparime në këtë fushë, veçanërisht me nisjen e Rrjetit të Përbashkët të Inteligjencës për Pastrimin e Parave në Kosovë (JMLINK) dhe me miratimin e Vlerësimit të ri për Krimin e Rëndë dhe të Organizuar (SOCTA).

Sipas raportit, shkëmbimi i informacionit përmes Aplikacionit të Rrjetit të Sigurt për Shkëmbim Informacionesh (SIENA) është rritur ndjeshëm.

BE ka pasur edhe disa rekomandime për Kosovën, të cilat janë zbatuar pjesërisht por që mbeten valide edhe gjatë vitit që po vjen.

Kosova duhet të:

-miratojë strategjinë kombëtare kundër krimit të organizuar dhe planin e saj të veprimit, në përputhje me standardet e BE-së; të përmirësojë më tej hetimin dhe ndjekjen penale të rasteve të profilit të lartë të krimit të organizuar; të synojë dhe të evidentojë në mënyrë proaktive grupet dhe rrjetet e krimit të organizuar;

– forcojë efikasitetin e regjimit të konfiskimit penal; në këtë drejtim, të krijojë një fond konfiskimi dhe të rrisë përdorimin e mjeteve të konfiskimit nga prokuroria dhe policia;

-forcojë mekanizmat për riintegrimin e viktimave të trafikimit me qenie njerëzore.