Gjykata Kushtetuese rikthen Erion Veliajn në krye të Bashkisë Tiranë, reagon Edi Rama

Shqiperi

Gazeta Express

04/11/2025 12:19

Gjykata Kushtetuese ka rrëzuar vendimin e qeverisë së Shqipërisë për shkarkimin e Erion Veliajt, duke e rikthyer atë në detyrën e kryetarit të Bashkisë së Tiranës. Një ditë pas njoftimit të vendimit, ka reaguar kryeministri i Shqipërisë Edi Rama, i cili tha se nëse Kushtetuesja ka vendosur se Veliaj mund të largohet vetëm me zgjedhje, atëherë mbajtja e tij në qeli “nuk është më thjesht në dëm të lirive dhe të drejtave të tij, por edhe në dëm të popullit të Tiranës.”

Reagimi i Ramës

Disa rrjedhime logjike nga vendimi i Gjykatës Kushtetuese:

1. Ja që edhe njëherë u provua se nuk i paskam kapur unë të tëra pushtetet dhe kjo është një gjë sa e qartë, aq edhe e mirë apo jo

2. Nëse Tirana nuk do të ketë zgjedhje deri në 2027-ën dhe Kushtetuesja mendon se kryebashkiaku i burgosur i Tiranës nuk mund të largohet përveçse me zgjedhje, atëherë disproporcioni i mbajtjes së tij në qeli nuk është më thjesht në dëm të lirive e të drejtave kushtetuese të personit, po edhe në dëm të së drejtës kushtetuese të popullit të kryeqytetit për t’u shërbyer nga i zgjedhuri i vet apo jo

3. Çdo njeri normal që nuk sheh tek qëndrimi i Kushtetueses një qëndrim të verbër kundër qeverisë në dëm të madh të Tiranës, po një qëndrim të vendosur parimor, nuk ka se si të mos presë që me të njëjtën parimësi, kur të gjykojë paraburgimin e tij, Kushtetuesja ta kthejë Erion Veliajn në detyrë, për të vijuar procesin gjyqësor në gjendje të lirë apo jo

Pika 1 dhe 2 janë të sigurta, pika 3 mbetet për t’u parë, ndërkohë le të urojmë që kushdo ka në dorë ta ndihmojë zgjidhjen e këtij ngërçi absurd, të kujtohet se kryeqytetu nuk mund të trajtohet si jetim, për vite me radhë.

/Gazeta Express