Kryetari i KQZ-së: Deri më tani nuk janë raportuar parregullsi që cenojnë integritetin e zgjedhjeve

Lajme

Gazeta Express

12/10/2025 11:51

Procesi i votimit në zgjedhjet e sotme po zhvillohet në mënyrë të qetë dhe të rregullt, pa ndonjë incident apo parregullsi që do të mund të cenonte integritetin e zgjedhjeve. Kështu ka bërë të ditur Komisioni Qendror i Zgjedhjeve (KQZ), duke u mbështetur në informacionet e siguruara nga Komisionet Komunale të Zgjedhjeve.

Kryetari i KQZ-së Kreshnik Radoniqi, ka deklaruar se trupa zgjedhore në terren dhe institucionet përgjegjëse janë në komunikim të vazhdueshëm me KQZ-në, me qëllim të sigurimit të një procesi të mbarë dhe në përputhje me ligjin dhe rregulloret zgjedhore.

Sipas të dhënave preliminare të përpunuara nga rreth 94% e vendvotimeve, deri në orën 11:00 kanë votuar 158,691 qytetarë, apo 7.84% e numrit të përgjithshëm të votuesve, që është 2,025,105.

Në krahasim me zgjedhjet lokale të vitit 2021, pjesëmarrja në këtë orë është pak më e ulët. Atëherë, deri në orën 11:00 kishin votuar 152 mijë qytetarë, që përbënte 8.2% të trupës votuese prej 1,885,448 votuesve.

KQZ ka bërë të ditur se të dhënat e detajuara për pjesëmarrjen e votuesve sipas komunave dhe qendrave të votimit mund të gjenden në ueb-faqen zyrtare të institucionit.

Për më tepër, KQZ ka paralajmëruar se në orën 13:00 do të përditësohen të dhënat për pjesëmarrjen e qytetarëve në votime, ndërsa konferenca e tretë për media nga ky institucion do të mbahet në orën 15:30.