Të burgosur nga Belgjika së shpejti në burgjet e Kosovës?

Lajme

Gazeta Express

10/10/2025 12:30

Burgjet në Belgjikë janë të mbushur në limitet e tyre dhe mungojnë rreth 2000 vende. Qeveria belge po bën përpjekje të gjejë një zgjidhje dhe po ndjek shembullin e marrëveshjes Danimarkë-Kosovë.

Nisur nga mungesa vendeve në burgjet belge, qeveria në Bruksel do të strehojë disa të burgosur në burgjet e Kosovës. Sipas agjencisë belge të lajmeve, Belga, qeveria po shqyrton mundësinë e marrjes me qira ose të ndërtimit të një burgu në Kosovë për të vendosur atje personat e dënuar ose persona pa leje qendrimi në Belgjikë.

Kosova ka një marrëveshje të ngjashme me Danimarkën. Ministrja belge e Drejtësisë, Annelies Verlinden, si dhe ministrja e Migracionit, Anneleen Van Bossuyt, së fundi udhëtuan në Kosovë për të zhvilluar bisedime lidhur me këtë.

Një ligj i ri për shkak të mungesës së vende në burgje

Burgjet e mbushura në limitet e kapaciteteve të tyre janë kthyer në problem për Belgjikën. Këtë verë hyri në fuqi një ligj i ri, në bazë të të cilit në aktgjykimet për dënimin me burg duhet të argumentohet me saktësi se përse është domosdoshmërisht i nevojshëm dënimi me burg. Në Belgjikë mungojnë aktualisht rreth 2000 vende në burgje.

Në vitin 2014 Belgjika u dënua nga Gjykata Europiane për të Drejtat e Njeriut për shkak të kushteve jodinjitoze në burgje dhe vazhdimisht pas kësaj ky vend është kritikuar nga Këshilli i Europës. Kosova dëshiron mbështetje nga Belgjika në rrugën e saj të afrimit me BE-në si një vend i mundshëm kandidat për antarësim, vë në dukje agjencia e lajmeve Belga.