Mbyllen dy azile pleqsh në Shkup për trajtim çnjerëzor, dy të arrestuar

Maqedoni

Gazeta Express

09/10/2025 12:13

Dy azile private për pleq në Shkup janë mbyllur pas një hetimi që zbuloi abuzim dhe dhunë fizike ndaj të moshuarve.

Ministria e Politikës Sociale, Demografisë dhe Rinisë në Maqedoninë e Veriut njoftoi se disa nga të moshuarit janë rikthyer pranë familjeve të tyre, ndërsa të tjerët po kujdesen në azilet shtetërore dhe Spitalin Klinik në Shkup.

“Ministria është në kontakt të vazhdueshëm me familjet dhe kujdestarët e caktuar për të marrë përsipër përfituesit. Disa nga përfituesit janë pranuar nga familjet e tyre, ndërsa dyert e azileve shtetërore dhe Spitalit Klinik janë të hapura për ata që kanë nevojë për trajtim”, ka thënë Ministria në një përgjigje për “PlusInfo”.

Hetimi filloi pas bastisjeve në katër lokacione që lidhen me dy institucione private për mbrojtje sociale të të moshuarve, për shkak të dyshimeve për trajtim çnjerëzor. Sot po kryhen bastisje në dy lokacione të tjera të lidhura me rastin.

Deri më tani, dy persona janë arrestuar. Ministria e Brendshme ka ngritur kallëzim penal kundër N.J., 47 vjeç, dhe T.I., 58 vjeç, të dy nga Shkupi, të cilët dyshohen për trajtim çnjerëzor, mizor, degradues dhe poshtërues ndaj të moshuarve, për të cilët familjet e tyre paguanin për shërbime strehimi jo-familjare.