“Paqja më në fund duket e arritshme” – reagojnë liderët botërorë pas marrëveshjes mes Izraelit dhe Hamasit

Lajme

Gazeta Express

09/10/2025 10:20

Izraeli dhe Hamasi më në fund kanë arritur të bëjnë marrëveshje armëpushimi.

Liderët botërorë kanë vazhduar të reagojnë ndaj njoftimit të mbrëmshëm:

Shefja e Komisionit Evropian, Ursula von der Leyen, vlerëson përpjekjet diplomatike për arritjen e marrëveshjes dhe thotë se është “e inkurajuar” nga mbështetja e dhënë nga qeveria izraelite dhe Autoriteti Palestinez.

“Tani, të gjitha palët duhet t’i përmbahen plotësisht kushteve të marrëveshjes,” tha ajo.

Shefja e politikës së jashtme të BE-së, Kaja Kallas, thotë se marrëveshja “përfaqëson një përparim të rëndësishëm” dhe paraqet “një mundësi reale për t’i dhënë fund një lufte shkatërrimtare dhe për të liruar të gjithë pengjet.”

Presidenti francez, Emmanuel Macron, thotë se Franca është “gati të kontribuojë” në arritjen e paqes dhe ka bërë thirrje që “të gjitha palët t’i përmbahen rreptësisht kushteve të saj.”

Kryeministri kanadez, Mark Carney, thotë se është “i lehtësuar që pengjet së shpejti do të ribashkohen me familjet e tyre. Pas viteve të vuajtjeve të thella, paqja më në fund duket e arritshme.”

Ndërkohë, presidenti turk, Recep Tayyip Erdoğan, thotë se është “shumë i kënaqur” që negociatat kanë rezultuar në një marrëveshje armëpushimi, por shton se “do të vazhdojmë përpjekjet tona deri në themelimin e një shteti palestinez.”