Orari i ri në shkollat e mesme të Cyrihut: Mësimet nuk fillojnë aq herët si zakonisht

Lajme

Gazeta Express

07/10/2025 14:35

Mësimi në Cyrih do të nisë më vonë: Vendim në mbështetje të nxënësve

Këshilli Komunal i Cyrihut ka miratuar një nismë parlamentare që ndalon fillimin e mësimeve në shkollat e mesme para orës 08:00 të mëngjesit, duke i dhënë fund praktikës aktuale ku disa shkolla fillonin që në orën 07:30, transmeton albinfo.ch.

Vendimi bazohet në studime të ndryshme që tregojnë se nxënësit e shkollave të mesme mësojnë më pak në orët e para të mëngjesit. Sipas hulumtimeve, efikasiteti i të nxënit rritet kur nxënësit fillojnë mësimet pak më vonë.

Megjithatë, nxënësit nuk do të mund të flenë më gjatë menjëherë: shkollat kanë deri në katër vjet kohë për të zbatuar këtë ndryshim në orar. Shtyrja e fillimit të mësimeve me 30 minuta kërkon përshtatje të shumta organizative, përfshirë ndryshime në transportin publik, oraret e mësuesve dhe aktivitetet jashtëshkollore.

Ky ndryshim synon të përmirësojë përqendrimin dhe mirëqenien e të rinjve gjatë ditës shkollore.