Berisha në Strasburg: Shqipëria po shndërrohet në shtet narkotik, qeveria po dhunon Kushtetutën dhe lirinë e medias

Shqiperi

Gazeta Express

01/10/2025 20:05

Kryetari i Partisë Demokratike, Sali Berisha, ka akuzuar ashpër qeverinë shqiptare gjatë një fjalimi para grupit të Partive Popullore Evropiane (PPE) në Asamblenë Parlamentare të Këshillit të Europës në Strasburg.

Berisha deklaroi se kërcënimi më i madh ekzistencial për shqiptarët është droga dhe shndërrimi i Shqipërisë në një shtet të kapur nga krimi i organizuar. Ai u shpreh se përfaqësues të qeverisë shqiptare kanë zhvilluar takime në Aruba me kartele të njohura droge për të investuar paratë e tyre në vend, duke theksuar se kjo është konfirmuar nga antimafia italiane.

Ai kritikoi mënyrën e miratimit të programit qeveritar në Kuvend, duke thënë se ai u votua për vetëm 28 minuta, pa debat dhe në shkelje të rregullave parlamentare dhe Kushtetutës.

Berisha denoncoi gjithashtu sulmet ndaj mediave kritike, duke përmendur një rast ku një televizion opozitar u rrethua nga policia dhe ushtria, ndërsa gazetarëve iu sekuestruan pajisjet me materiale hetimore që implikonin ministra. Ai shtoi se vendimi i gjykatës për të rikthyer ambientet e televizionit nuk është zbatuar ende.

Ai ngriti shqetësime edhe për mungesën e autonomisë së pushtetit vendor dhe kontrollin e tepruar të qeverisë qendrore, duke thënë se kryeministri shkarkon vetë kryebashkiakë dhe drejtorë lokalë si të ishte një emir.

Ndër të tjera, Berisha tha se po verifikohet edhe një sistem përgjimi i internetit, duke përmendur bllokimin e TikTok-ut si një rast domethënës. Ai njoftoi se Kongresi i Autoriteteve Lokale të Këshillit të Europës do të sjellë një mision të posaçëm për të hetuar situatën në vend.