Filipçe: LSDM nuk ka bashkëpunim as me BDI-në e as me Levicën

Maqedoni

Gazeta Express

30/09/2025 16:59

LSDM nuk ka bashkëpunim me BDI-në ose Levicën, tha sot lideri i partisë opozitare Venko Filipçe. Ai theksoi se partia e tij do të kandidojë në zgjedhjet e ardhshme lokale së bashku me partnerët e tyre të koalicionit, dhe u kërkoi kundërshtarëve politikë VMRO-DPMNE dhe BDI të mos nxisin nacionalizëm dhe të diskutojnë çështje të rëndësishme dhe serioze, transmeton Portalb.mk.

“Këto janë vetëm akuza boshe. Ne do të kandidojmë në zgjedhje vetëm, së bashku me partnerët tanë të koalicionit. I dëgjoj akuzat midis VMRO-DPMNE dhe BDI dhe besoj se nuk ka asgjë të mirë në nxitjen e nacionalizmit, nga retorika dhe akuzat boshe. Të gjithë aktorët politikë duhet të flasin për tema serioze, si është ngritur vetëqeverisja lokale para zgjedhjeve, si do të rregullohen taksat, për reformat në sistemet shëndetësore dhe arsimore”, tha Filipçe.

Filipçe komentoi edhe situatën në gjyqësor, për të cilën thotë se nuk është miratuar asnjë ligj reformues, ndërsa Qeveria nuk ka kapacitet për t’u përballur me sfidat.

“Nga 12 ligjet që duhej të miratoheshin këtë vit, shtatë prej tyre duhej të miratoheshin deri në qershor dhe pesë të tjera deri në vitin e ri, por asnjë nuk është miratuar dhe asnjë nuk është paraqitur nga Ministria e Drejtësisë në Parlament. Është e qartë se VMRO-DPMNE dëshiron të kontrollojë gjyqësorin”, tha Filipçe.

Ai gjithashtu nuk pajtohet me deklaratën e kryeministrit Hristijan Mickoski se Maqedonia është e pesta në Evropë për sa i përket rritjes së pagave.

“Realiteti është ndryshe, kryeministri mund të thotë çfarë të dojë, por pagat po bien për të tretin muaj radhazi. Qytetarët nuk do t’u besojnë deklaratave të rreme sepse ata e dinë më mirë nëse mund t’ia dalin mbanë gjatë muajit. Unë me të vërtetë nuk e di pse Qeveria nuk po i përdor mekanizmat që ka në dispozicion”, tha Filipçe.

Mickoski, në tubimin e parë me të cilin VMRO-DPMNE nisi fushatën zgjedhore mbrëmë në Shkup, përsëriti pretendimet se ekziston një koalicion pa parime midis BDI-së dhe Levicës për zgjedhjet lokale.

Ndryshe, më 29 shtator në Maqedoninë e Veriut filloi fushata zgjedhore për zgjedhjet lokale të këtij viti, rrethi i parë i të cilave do të mbahet më 19 tetor. Fushata do të zgjasë pandërprerë deri më 17 tetor, ndërsa fushata për rrethin e dytë, i cili do të mbahet më 2 nëntor, do të vazhdojë deri më 31 tetor.