UEFA ul dënimin ndaj ekipit malazez: 7 vite përjashtim dhe 400 mijë € gjobë për kurdisje

Futboll

Gazeta Express

25/09/2025 16:30

Klubit malazez FK Arsenal Tivat i është ulur ndalimi nga garat evropiane për trukim ndeshjesh me tre vite pas apelimit të bërë në UEFA.

Në korrik, klubi u dënua me 10 vite përjashtim nga UEFA pas hetimeve për ndeshjen e raundit të parë kualifikues të Ligës së Konferencës në vitin 2023 kundër skuadrës armene Alashkert.

Arsenal Tivat barazoi 1-1 në transfertë te Alashkert, por më pas pësoi humbje të thellë 6-1 në shtëpi në ndeshjen e kthimit.

Tashmë ndalimi i klubit është reduktuar në shtatë vite, ndërsa portieri Dusan Puletic, i cili gjithashtu ishte pezulluar për 10 vite, është liruar për të luajtur sërish pasi fitoi apelimin e tij.

Në korrik, UEFA kishte gjetur se klubi kishte shkelur nenin 11 të rregullores disiplinore që ka të bëjë me “parimet e përgjithshme të sjelljes”, si dhe nenin 12 që lidhet me “integritetin e ndeshjeve, garave dhe trukimin e tyre”.

Dënimi fillestar i klubit parashikonte përjashtim deri në sezonin 2034/35 dhe një gjobë prej 500,000 euro.

Gjithashtu, lojtari Nikola Celebic dhe zyrtari Ranko Krgovic u ndaluan me përjetësi nga çdo aktivitet i lidhur me futbollin, ndërsa tre lojtarë të tjerë – Cetko Manojlovic, Radule Zivkovic dhe Puletic – u dënuan me nga 10 vite pezullim.

Megjithatë, pas apelimit në Trupin e Apelit të UEFA-s, pezullimi i klubit tani do të zgjasë deri në fund të sezonit 2031/32, ndërsa gjoba është ulur në 400,000 € (349,000 £).

Ndërkohë, apelimi i Puletic ka bërë që vendimi i Komisionit të Kontrollit, Etikës dhe Disiplinës së UEFA-s nga korriku të përmbyset, duke i anuluar pezullimin.

Sezonin e kaluar, Arsenal Tivat fitoi ndeshjen e play-off-it të mbijetesës për të ruajtur vendin e tij në Ligën e Parë të Malit të Zi.