Kryetari i Londrës “shpërthen” ndaj Trumpit: Ai është mizogjen, racist, seksist dhe islamofob

Lajme

Gazeta Express

24/09/2025 14:38

Kryebashkiaku i Londrës, Sadiq Khan, iu përgjigj ashpër kritikave të fundit ndaj Presidentit të SHBA-së, Donald Trump, duke e quajtur atë “racist, seksist, mizogjin” dhe “islamofob”, shkruan Sky News.

Khan tha se po “jetonte falas” në kokën e Trump pasi presidenti amerikan e përdori fjalimin e tij në Asamblenë e Përgjithshme të OKB-së të martën për të kritikuar Mbretërinë e Bashkuar, me theks të veçantë Londrën.

Trump vazhdoi kritikat e tij të kahershme ndaj Khan, duke thënë se kryeqyteti i Mbretërisë së Bashkuar drejtohej nga një “kryetar bashkie i tmerrshëm” i cili e kishte “ndryshuar” qytetin. Ndër pretendimet e tij më të pazakonta ishte se ligji i sheriatit po zbatohet në Londër, për të cilin nuk ka prova.

I pyetur për të komentuar mbi sulmet e presidentit amerikan, Khan tha: “Mendoj se Presidenti Trump ka treguar se është racist, seksist, mizogjin dhe islamofob.” Ai vazhdoi duke thënë se publiku duhet të “pyet se çfarë ka ky kryetar bashkie mysliman që drejton një qytet liberal, multikulturor, progresiv dhe të suksesshëm që e bën të duket sikur jetoj në kokën e Donald Trump falas”.

Trump fajësoi gjithashtu Khan për rritjen e krimit në Londër, të cilin ai pretendon se është “rritur ndjeshëm”, dhe e quajti atë një “katastrofë” për imigracionin. Këto komente, të bëra në aeroplanin presidencial Air Force One gjatë rrugës për në Uashington, shkaktuan një reagim të ashpër nga zyra e kryetarit të bashkisë së Londrës.

“Londra është qyteti më i madh në botë, më i sigurt se qytetet e mëdha amerikane, dhe ne jemi të kënaqur të mirëpresim një numër rekord qytetarësh amerikanë që lëvizin këtu”, tha zëdhënësi i Khan.

Marrëdhëniet e tensionuara midis Khan dhe Trump kanë vazhduar prej vitesh dhe gjithçka filloi në vitin 2015 kur presidenti amerikan bëri thirrje për një “ndalim total dhe të plotë” të hyrjes së myslimanëve në Shtetet e Bashkuara.