Televizioni i Real Madridit konfirmon se klubi po përgatit një dosje për ta dërguar në FIFA rreth ankesave për gjyqtarë

Futboll

Gazeta Express

14/09/2025 16:01

Real Madrid mund të kontaktojë FIFA-n për shkak të frustrimit të vazhdueshëm me vendimet e arbitrave që, sipas tyre, po shkojnë kundër tyre në La Liga.

Burime pranë “Los Blancos” kanë sinjalizuar edhe gjatë 12 muajve të fundit se klubi është i gatshëm ta çojë çështjen në instancën më të lartë të futbollit botëror.

Episodi më i fundit lidhet me kartonin e kuq të Dean Huijsen në fitoren 2-1 ndaj Real Sociedad, ku skuadra e Xabi Alonsos luajti pjesën më të madhe të ndeshjes me një lojtar më pak.

Në fund të ndeshjes, Alonso shprehu hapur pakënaqësinë e tij, duke thënë se nuk e pranonte shpjegimin e arbitrit për vendimin e marrë. Ndërkohë, Real Madrid TV hyri në ofensivë.

RMTV është shndërruar në zëdhënës të zemërimit të tifozëve dhe, pavarësisht reputacionit për deklarata të ekzagjeruara, ka ndikim në debatin publik.

Sipas disa mediave, përfshirë “Diario AS”, televizioni spanjoll ka konfirmuar se klubi është duke përgatitur një “dosje” që do t’i dërgohet FIFA-s për të shprehur zemërimin ndaj përjashtimit të Huijsen dhe një sërë padrejtësish të perceptuara.

Periudha që do të mbulojë dosja është “katër ndeshjet e para të këtij sezoni dhe gjithashtu sezonin e kaluar”, ndërsa kartoni i kuq i Huijsen shihet si pika e fundit e durimit.

“Ky kampionat është një turp për shkak të asaj që sapo përjetuam. Real Madrid me një lojtar më pak. Dean Huijsen i përjashtuar dhe Xabi Alonso mori të verdhë, qartësisht sepse është i indinjuar si të gjithë tifozët e Real Madridit. Ky është një turp për garën,” deklaroi RMTV pas ndeshjes.

“Ata e shtrembërojnë realitetin sërish. Sërish e kthejnë një episod të qartë në diçka të interpretuar. E përdredhin realitetin dhe e justifikojnë këtë lloj gjëje. Pasojat? Do t’i shohim, por ata e shtrembërojnë realitetin. Arbitrat e kanë shtrembëruar realitetin sërish.”

Klubi është veçanërisht i irrituar me vendimin e arbitrit të VAR-it, Figueroa Vázquez, i cili nuk e ftoi gjyqtarin kryesor, Jesús Gil Manzano, që të rishikonte episodin në monitorin anës fushës./GazetaExpress/