Fushata zgjedhore, KQZ tregon rregullat për subjektet politike dhe mbështetësit e tyre

Lajme

Gazeta Express

13/09/2025 10:19

Për herë të dytë brenda të njëjtit vit, shumica e subjekteve politike në Kosovë, do të zhvillojnë fushatën e tyre zgjedhore në kërkim të mbështetjes së votuesve.

Nën një situatë politike të paqartë për shkak të moskonstituimit dhe formimit të institucioneve qendrore, si Kuvendi dhe Qeveria, subjektet politike kësaj radhe do të kërkojnë mbështetjen për të zgjedhur drejtuesit e institucioneve në nivelin lokal, tridhjetë e tetë kryetarët e komunave dhe 942 anëtarët e kuvendeve komunale.

Zëdhënësi i Komisionit Qendror të Zgjedhjeve, Valmir Elezi, ka shpjeguar për KosovaPress, se fushata zgjedhore për 93 subjektet politike me mbi 5 mijë e 600 kandidatë, do të zhvillohet nga sot deri në orën 06:59 të datës 12 tetor.
Ai ka treguar për ndalesat dhe kufizimet ligjore gjatë periudhës së fushatës zgjedhore që duhet t’i respektojnë subjektet politike dhe mbështetësitë e tyre.

“Ligji për Zgjedhjet e Përgjithshme ka përcaktuar një sërë veprimesh të ndaluara për subjektet politike, kandidatët dhe mbështetësit e tyre, gjatë fushatës zgjedhore. Këto ndalesa lidhen kryesisht me mospengimin e fushatës së kundërshtarit politik dhe ndalimin e rreptë të kërcënimeve dhe dhunës gjatë procesit zgjedhor. Në përgjithësi, sipas ligjit, fushata duhet të zhvillohet në një atmosferë të qetë, të respektueshme, demokratike, pa gjuhë urrejtjeje, pa frikësime dhe e distancuar nga çdo formë dhune”, tha Elezi.

Gjatë fushatës zgjedhore për zgjedhjet për Kuvendin e Kosovës të mbajtura më 9 shkurt, PZAP kishte shqiptuar gjoba në vlerën e 651 mijë eurove ndaj subjekteve politike që kishin shkelur Kodin e Mirësjelljes.

Gjatë fushatës zgjedhore, KQZ do të angazhojë monitorues në komuna të ndryshme të cilët do të përcjellin organizimin e takimeve, fushatave reklamuese dhe materialeve tjera promovuese.

Për pjesëmarrje në zgjedhjet lokale të 12 tetorit, KQZ ka certifikuar 93 subjekte politike, prej të cilave, 33 parti politike, dy koalicione, 32 iniciativa qytetare dhe 27 kandidatë të pavarur.

Vetëm në zgjedhjet për kryetarë të komunave janë 206 kandidatë, ndërkaq për Kuvende Komunale më shumë se 5 mijë e katërqind.

Përndryshe, 46 mijë e 15 shtetas të Kosovës nga 46 shtete të ndryshme të botës, janë regjistruar për të votuar përmes postës në zgjedhjet lokale për kryetarë të komunave dhe për kuvende komunale.

Lëvizja Vetëvendosje ka vendosur që hapjen e fushatës ta bëjë dje, një ditë para hapjes zyrtare të fushatës elektorale për zgjedhjet lokale të 12 tetorit, një veprim i tillë po konsiderohet shkelje ligjore.

Profesori i të drejtës kushtetuese, Mazllum Baraliu thotë se afatet e parapara operacionale nga Komisioni Qendror i Zgjedhjeve duhet të respektohen nga partitë politike.

Ky veprim i LVV u kritikua nga njohës të proceseve zgjedhore. Eugen Cakolli nga Instituti Demokratik i Kosovës thotë se nuk ka qenë praktikë deri më tani që tubimet hapëse të mbahen para fillimit zyrtar të fushatës zgjedhore.

Sipas tij, Lëvizja Vetëvendosje nuk mund të mbikëqyret nga KQZ-ja dhe PZAP-ja nuk mund të shqiptojnë gjoba për shkeljet eventuale./KP/