Gjithçka që tha Edon Zhegrova në konferencë për shtyp: Jam krenar, shpejt do të luajë për Juventus

Futboll

Gazeta Express

11/09/2025 16:21

Edon Zhegrova është ‘krenar’ që iu bashkua Juventusit, por pranon se ende duhet të rikuperojë plotësisht formën: ‘Shumë shpejt do të jem gati për të luajtur.’

Zhegrova iu bashkua Juventusit me transferim të përhershëm nga Lille në ditën e fundit të merkatos dhe u prezantua në një konferencë për shtyp në Allianz Stadium në Torino, të enjten.

Konferenca e prezantimit të Zhegrovës te Juventusi

“Jam shumë i lumtur dhe krenar, ditët e para kanë qenë fantastike,” tha përfaqësuesi i Kosovës, përmes Ilbianconero.com.

Zhegrova është ribashkuar me ish-shokun e tij të skuadrës te Lille, Jonathan David, i cili iu bashkua Juventusit me parametër zero në fillim të merkatos verore.

“Klubi më bindi. Gjithmonë kam dashur t’i bashkohem një klubi të madh, dhe projekti më ka bindur,” vazhdoi Zhegrova.

“E njoh Davidin, e di që ka kualitet, dhe ekipi gjithashtu ka kualitet. Besoj se mund të jap kontributin tim. U gëzova për interesimin e tyre që në bisedën e parë me Comollin dhe Chiellinin. Ishte një ëndërr që po bëhej realitet.”

26-vjeçari nuk ka luajtur asnjë ndeshje zyrtare që nga dhjetori 2024 për shkak të një dëmtimi në aduktor, por është i bindur se së shpejti do të jetë i gatshëm për të luajtur.

Zhegrova ‘shumë shpejt’ i gatshëm për Juventusin

“Kam kaluar një periudhë të vështirë fizikisht, por tani ndihem më mirë,” pranoi ai.

“Kam filluar të punoj sërish për të arritur formën maksimale, dhe stafi po më ndihmon. Besoj se shumë shpejt do të jem gati dhe i aftë për të luajtur.”

Kjo do të thotë se ai nuk do të jetë i gatshëm të shtunën, kur Juventusi pret rivalët e Interit në Allianz Stadium në javën e 3-të të Serie A.

“Ende nuk do të jem pjesë e ndeshjes; më duhet të punoj edhe pak. E di rëndësinë e lojës dhe do ta mbështes skuadrën,” tha Zhegrova.

Talenti i krahut e ka përballuar tashmë Juventusin një vit më parë, në barazimin 1-1 në Ligën e Kampionëve mes “Zonjës së Vjetër” dhe Lille.

“Kur luaja kundër tyre, gjithmonë ishte diçka e madhe dhe një mundësi për të treguar vlerat tona. Ai kapitull ka mbaruar tashmë. Jam i lumtur që jam këtu, dhe të gjithë po e bëjnë këtë tranzicion të lehtë. Jam i lumtur që jam pjesë e kësaj dhe mezi po pres.” /GazetaExpress/